तहसील में बेठी तक्सीन
जिला महोबा, ब्लाक कबरई, कस्बा श्री नगर, मनोहर गंज दाऊपुरा मोहल्ला। एते की तक्सीन आपन बिटिया गुलप्सा की शादी 1 मार्च 2013 खा बांदा जिला के सलीम के साथ करी हती। तभई शादी अनुदान को फारम भर के 14 मार्च 2013 खा समाज कल्याण आफिस में जमा करो हे। जीखो रूपइया अभे तक नई मिलो आय। रूपइया के लाने तक्सीन हफ्तन से विभाग के चक्कर काटत हे।
तक्सीन ने बताओ कि मेंने आपन बिटिया गुलप्सा की शादी 1 मार्च 2013 में बांदा जिला के बदौसा देहात में करी हती। मेने शादी अनुदान को 14 मार्च 2013 खा फारम समाज कल्याण आफिस में जमा करो हतो, पे अभे तक ऊ रूपइया मिले को नाम नई आउत आय। मेंने केऊ दइयां समाज कल्याण आफिस में पता करो हे तो ऊ कहत हें कि अभे रूपइया नई आओ आय। मेंने बिटिया के शादी में चालिस हजार रूपइया कर्जा लओ हतो। सोचत हती कि तीस हजार रूपइया शादी अनुदान को मिलहे तो कर्जा चुका देहों। एई से मेने 19 नवम्बर 2013 खा तहसील दिवस में दरखास दई हे। तक्सीन कहत हे कि अगर मोई एते सुनवाई न होहे तो में डी.एम. खा दरखास देहों।
समाज कल्याण आफिस की कनिष्ठ लिपिक बन्दना पाखरे ने बताओ कि जोन बाबू अल्पसंख्यक के शादी अनुदान की जिम्मेदारी देखत हें, ऊ अभे छुट्टी में हें। ईखे बारे में ओई जानकारी दे सकत हें।