नई मिलत समाजवादी पेंशन

जिला महोबा, ब्लाक जैतपुर, गांव कैथोरा। एते के आदमियन को आरोप हे की हमाये एते के लगभग बीस आदमियन के समाजवादी पेंसन से नाम काट दये हे। आदमी पेंसन पायें के लाने भटकत हे।
रामप्यारी कहत हे की मोये आदमी कड़ोरी लाल खा मरे बीस साल हो गये हे। अभे तक मोई पेंसन नई बधी हे। फूलारानी पति देशराज बताउत हे की तीन बच्चा हे। कच्चे घर पे हम अपनो गुजारा करत हे। हमे समाजवादी पेंसन को लाभ नई मिलत हे। जभे की हमने पांच दइयां फारम भर चुके हे।
भूरी बताउत हे की आठ लोगन को परिवार हे। हमाये पास एकऊ जमीन नईयां हम मजदूरी करके परिवार चलाउत हे। हमने प्रधान से केऊ दइयां कहो हे की हमाई सामाजवादी पेसन बनवा देये, पे ऊ हां कहके टार देत हे। पुष्पा कहत हे की परिवार पांच लोग हे। एक जने कमात हे बाकी सब छोट्-छोट् बच्चा हे। जोन घर मे रहत हे। हमाये मजदूरी भर से परिवार को भरण पोषण नईं हो पाउत हे। एक दिन मे दो सौ रूपइया आटा ओर सब्जी खा लगत हे।
प्रधान चरन सिंह बताउत हे की 25 लोगन खा समाजवादी पेंशन मिलत हे। सत्तर आदमियन के फारम भरे हते। अभे गांव मे डेढ़ सौ एसे आदमी हे, जीखे फारम भरने हे।

रिपोर्टर – श्यामकली