धान कै गली फसल
जिला फैजाबाद, ब्लाक तारुन, पूरा बाजार अउर मया। फैजाबाद मा कहूं बारिश से धान कै फसल सड़ गै तौ कहूं खेत के सिंचाई न होय पावै से खेत मा दरार पड़ गै बाय। अउर तौ अउर सरकारी टयूबवेल भी महीना भर से बिगड़ी बाय।
ओझाने गांव कै निवासी रामसजीवन कै कहब बाय कि धान लगावै के दिन मा ट्यूबेल बिगड़ा बाय। 120 रुपया घण्टा सिंचाई दै के तिसरे दिन सिंचाई नाय कै पाइत। ट्यूबवेल कै देखभाल करै वाले महेश प्रताप पाण्डेय बताइन कि नलकूप विभाग फैजाबाद मा बनै के ताई दिया बाय। दुई तीन महीना मा बनिके आय जाये। नलकूप विभाग फैजाबाद कै जेई नेबूलाल बताइन कि काम चलत बाय एक हफ्ता मा भेज दीन जाये।
ब्लाक पूरा बाजार गांव मूड़ाडीहा माझा कै सबिता, राजपति बताइन कि हमार धान कै चार बिगहा फसल डूब गै बाय। दुसरी तरफ गन्ना कै खेती पै भारी नुकसान भा बाय। पिपरी माझा कै भगौती प्रसाद बताइन कि हमार धान, गन्ना, परवल, सब्जी कै खेती बाढ़ के कारण डूब गै। अम्बेडकर नगर, ब्लाक कटेहरी गांव पैहतीपुर मा कोहासा तालाब के कारण धान नाय बैठ पावत। प्रधान पार्वती गुप्ता कै आदमी सुरेश बताइन कि हम कहूं मांग नाय करे हई।
मया ब्लाक के जरही गांव मा बब्लू सिंह कै लगभग एक बिगहा गन्ना गलिगा। अउर धान कै बेरन गलिगै। मंगरु, इन्द्रावती बताइन कि हर साल धान के फसल का नुकसान हुआ थै। कउनौ मुआवजौ नाय मिलत। सिकरेटरी जीसान हैदर बताइन कि जवन गांव माझा मा रहाथै अउर ज्यादा नुकशान हुआ थै वनही का मिला थै।