दो साल से जला है ट्रांसफार्मर, क्या नई सरकार लगवाएगी

जिला चित्रकूट, ब्लाक रामनगर, कस्बा रामनगर उत्तर प्रदेश के नई सरकार का नई चुनौती का सामना करे का पड़ी। बिजली के जला ट्रांसफार्मर बदलावे का पड़ी। काहे से हिंया के दलित बस्ती मा 2 साल से ट्रांसफार्मर फुंका पड़ा हवै पै बिजली विभाग ध्यान नहीं देत हवै। शादी हो चाहे बोर्ड परीक्षा सब अंधेरे मा होत हवै।
विनोद कुमार का कहब हवै कि हम गांव मा रहै वाले आहीं पै हमें जिए का अधिकार हवै अउर बिजली के जरूरत हवै। बिजली के कारन बच्चन के पढ़ाई नींक तान नही होइ पावत। बिजली के कारन बहुतै समस्या हवै। बिजली विभाग कहत हवै पहिले बिल जमा करो तबै ट्रांसफार्मर लगावा जई।
फूलचंद अउर शिवपाल का कहब हवै कि कर्वी पावर हाउस 10 महीना पहिले फुंका ट्रांसफार्मर लइ गे रहै पै आज तक दूसर ट्रांसफार्मरनहीं लगवाइन आय। यहै समय बच्चन के परीक्षा चलत हवै तौ सबसे ज्यादा बिजली के जरूरत पड़त हवै।
संदीप कुमार का कहब हवै कि हमार गांव मा पावर कम रहत हवै बस अड्डा मा पावर ज्यादा रहत हवै। सांसद विधायक कुछौनहीं करत हवै कहत हवै कि हमें वोट नहीं दिए हौ तौ हम कुछौ काम न करवइबै। या समय बोर्ड के परीक्षा चलत हवै। सुबेरे जब छः बजे दिन निकल आवत हवै तबहिने हम पढ़ित हन। दुपाहरी के लूक धूप मा आपन बोर्ड के परीक्षा के तैयारी करत हन ।
सुलोचन बताइस कि हमार रामनगर सबसे पिछड़ा हवै। 40 45 गांव के मालिक होय के बाद भी कुछौ विकास नहीं आय।छोटे-छोटे गांव मा भी तेज बिजली रहत हवै। पै हमें लाइट के साथे भी दीपक जलावे का पड़त हवै।
गांव के मड़ई 50-50 रुपिया चंदा कइके लगभग 14 हजार रुपिया बिजली विभाग मा जमा करिस रहै। पै अबै भी नवा ट्रांसफार्मर नहीं लगवावा गा आय।
सांसद प्रतिनिधि सुशील दिवेदी का कहब हवै कि मड़ई बिल नहीं जमा करिस रहै यहै कारन ट्रांसफार्मर नहीं लाग। अब आचार संहिता खतम होइ गे हवै तौ दुइ दिन मा ट्रांसफार्मर लाग जई।

रिपोर्टर- सदोद्रा देवी