देवारी नाच के बीच मारपीट

जिला बांदा, ब्लाक तिन्दवारी, गांव वालिसपुर अउर पलरा। 24 अउर 25 अक्टूबर का देवारी नाच होत समय मारपीट का मामला सउहें आवा है। पुलिस दूनौ मामलन मा कारवाही करिस है।
वासिलपुर का राजकरण यादव अउर सत्रोहन बताइन कि 24 अक्टूबर का देवारी नाच देखैं वालेन के भीड़ लाग रहै। गांव का राजा दारू के नशा मा धुत पन्द्रह बोर का तमंचा कमर मा खोसे देवारी नाच के बीच गाली गलौज करैं लाग। गांव के मड़ई फोन से पुलिस का सूचना दिहिन। पुलिस मौके मा आ के राजा का पकड़ लइगे है।
तिन्दवारी थाना के दरोगा अजय सिंह बताइन कि राजा के खिलाफ शस्त्र अधिनियम के धारा 3/25 के तहत मुकदमा लिख गा है।
दूसर मामला मा पलरा गांव के मड़ई बताइन कि 25 अक्टूबर 2014 का देवारी नाच के बीच शिवकुमार, पप्पू अउर अशोक, राजेश के बीच लाठी चलीं। दूनौ पक्ष घायल होइगें हैं। या मामला के रपट चिल्ला थाना मा लिखाई गे है।
चिल्ला थाना का मुंशी कालका प्रसाद बताइन कि मामला के जांच भे है। दूनौ पक्ष के खिलाफ मारपीट के धारा 323 अउर गाली गलौज के धारा 504 आई.पी.सी. के तहत मुकदमा लिख गा है। दूनौ पक्ष का धारा 151 के तहत चालान कइके जेल भेज दीन गा है।