जिला बांदा। 11 नवम्बर का रोड़वेज बस जसपुरा से बांदा जात रहै तबै ज्यादा कोहरा के कारन बस पैलानी पुल के रेलिंग तोड़ के केन नदी मा गिर गें है। जेहिसे चार मड़ई घायल होइगें अउर बस चलावें वाले के मउत होइ गे है।मड़ई बतावत हैं कि या घटना सुबेरे सात बजे भे है।रोड़वेज बस के वरिष्ठ केंद्र प्रभारी अरुण कुमार का कहब है कि विभाग कइत से घायल मड़इन का पांच-पांच हजार रुपिया अउर परिचालक का बीस हजार रुपिया दीन जई।चालक का दस हजार रुपिया दीन गा है। कार्यवाही होय के बाद चार लाख नब्बे हजार रुपिया दीन जइह।
घायल होरीलाल बताइस कि जब बस पुल के ऊपर चढ़ी है तौ कोहरा बहुतै ज्यादा रहा है अउर ट्रक आवत रहै तौ कोहरा के कारन ट्रक देखाई नहीं देत रहै। ट्रक पास मा आवै मा देखाई पड़ा तौ बस ड्राइवर बस का बचावै के कोशिश करिस तौ पुल के नीचे गिर गे। ड्राइवर बस बहुतै तेज चलावत रहै। छात्र शिवम दिवेदी बताइस कि ट्रैक्टर वाले से पता चला कि बस नदी मा गिर गे है। तौ हम दुई जने घायल मड़इन का बाहर निकाले हन।
घायल के रिश्तेदार सुरेश कुमार का कहब है कि चार मड़ई घायल होइ गे हैं बस मा कुल छह मड़ई रहै हैं।मुन्नी देवी बताइस कि लड़का बीमार रहै तौ देखे आवत रहै तबै घटना होइ गे है।
बाईलाइन-शिवदेवी
Published on Nov 13, 2017
