दिन दहाड़े भे दुइ लाख अस्सी हजार के लूट

जिला चित्रकूट, ब्लाक मऊ, कस्बा बरगढ़। हिंया 26 दिसंबर 2014 का भैरौं प्रसाद केशरवानी के साथै दिन मा साढ़े तीन बजे शाम के चार बदमाशन द्वारा बरगढ़ घाटी मा गोली मार के चार लाख अस्सी हजार रूपिया लूटै का मामला सउहें आवा हवै। कइयौ व्यापारी थाना मा रपट लिखाइन अउर 27 दिसंबर का किला चैराहा का जाम कइके कारवाही के मांग करिन।
कस्बा के भैरौं प्रसाद केशरवानी का कहब हवै कि मैं गेहूं के दुकान करत हौं। मैं मऊ भारतीय स्टेट बैंक से दुइ लाख अस्सी हजार रुपिया निकार के अपने घरै बरगढ़ जात रहौं। तबहिने बरगढ़ घाटी मा मोटर साइकिल मा सवार चार बदमाश आय अउर मोटर साइकिल रोकै का कहिन। मैं नहीं रोकेंव तौ फायर करिन यहिसे कनपटी मा गोली लाग। बदमाश रूपिया का बैग अउर मोबाइल लइके भाग गें। या बात का लइके व्यापार मंडल के पांच सौ लोग 27 दिसंबर का बरगढ़ किला चैराहा मा धरना प्रदर्शन करिन अउर कहिन कि कारवाही न होइ तौ जिला मा हंगामा होइ। बरगढ़ थाना के इस्पेक्टर राजाराम दुबे कहिन कि 394 (लूट करैं) के धारा लाग हवै। पुलिस आरोपी का पकड़ै के कोशिश मा लाग हवै।