दिनै दिन बढ़त बलात्कारी

जिला बांदा, ब्लाक बिसण्ड़ा थाना अउर नरैनी कोतवाली के क्षेत्रन मा मेहरियन साथै बलात्कार का मामला सउहें आवा है। बिसण्ड़ा थाना के गांव मा 14 अप्रैल 2014 का बलात्कार कीन गा अउर नरैनी क्षेत्र के गांव मा 16 अप्रैल 2014 का बलात्कार भा है। यहिसे उंई मेहरिया बांदा एस.पी. अउर नरैनी कोतवाली मा दरखास दइके नियाव के मांग करिन हैं।
बिसण्ड़ा क्षेत्र के वा मेहरिया बतावत है-“14 अप्रैल 2014 का मैं घर के बाहर चना समेटत रहौं तौ देवर अनिल अउर दिलीप दूनौ जने मोहिका पकड़ के गिरा दिहिन अउर बलात्कार करिन। यहिसे मैं एस.पी. के न मिलैं मा बांदा सी.ओ. का दरखास दइके नियाव के मांग कीने हौं। इं दूनौ एक साल से परेशान करे हैं। एक साल पहिले मोरे मनसवा का इनतान मारिन रहैं कि दुई जघा से गोड़ टूट गा है। गोड़ मा सरिया परी है। वा चलै नहीं पावत आय।” बांदा सी.ओ. पंकज कुमार पाण्डेय कहत हैं कि अनिल अउर दिलीप के खिलाफ कारवाही खातिर ओरन चैकी का आदेश कीन गा है। नरैनी कोतवाली क्षेत्र के एक गांव के मेहरिया बतावत है कि 16 अप्रैल 2014 का मनसर्वा इंटा पथाई करैं गा रहै। सुबेरे सात बजे मनसवा का खाना लइके जात रहौं। तबै गांव का नफीसा बलात्कार करिस। मोर गला दबा दिहिस है। यहिसे गला मा सूजन तक आ गे है। कउनौतान आपन जान बचा पाये रहौं। मैं नफीसा के खिलाफ नरैनी कोतवाली मा दरखास दीने हौं। नरैनी कोतवाली प्रभारी चैधरी रमेश सिंह कहत हैं कि आपस मा लड़ाई भे है। नफीसा का गिरफ्तार करैं खातिर पुलिस लाग है। अबै कउनौ मुकदमा नहीं लिख गा आय।