खबर लहरिया औरतें काम पर दहेज हत्या को लिख गओ मुकदमा

दहेज हत्या को लिख गओ मुकदमा

जिला महोबा, ब्लाक जैतपुर, गांव थुरट। एते के 21 साल की ओरत अनीता की लास कुंआ में मिली हे। अनीता के मायके वालेन को आरोप हे की दहेज के करीन के फेक दअसो हे। पुलिस दहेज हत्या के साथे दहेज उत्पीड़न को मुकदमा लिख जांच करत हे।
अनीता के भाई महेश बताउत हे अनीता की शादी 21 अप्रैल 2014 खा उदयभान के साथे करी हती। ससुराल वाले मोटर साइकिल मांगत हते। हमने देय से मना करो तो आय दिन गली गलौज करत हतो। मताई सियाबाई ने कहो कि में दो दिन पेहले थुरट लिबाउन गई हती। पे उदयभान ने अनीता खा नई भेजो हतो। दो दिना बाद उदयभान ने फोन करके बताओ कि तुम्हाई बहन कुंआ मे गिर गई हे। ईखी रिपोर्ट हमने 12 मई खा अजनर थाना में रिपोर्ट लिखाई हे।
जेठ चन्द्रभान ने बताओ कि मेंने मारपीट नई करी हे। अनीता पानी भरन गई हती। दो घण्टा तक नई आई तो हम ढूढ़े गये। तभई कुंआं मे लास मिली हे। हम मजदूर आदमी हे दहेज मगायें को झूठो आरोप लगाउत हे।
अजनर थाना के एस.ओ.राजीव यादव ने बताओ कि धारा 498 ए (दहेज उत्पीड़न) 304 बी (जान से मार देना) के तहत मुकदमा लिख गओ हे। अभे ईखी जांच सी.ओ. जी.पी. यादव करत हे।