खबर लहरिया औरतें काम पर दहेज न लावै पै हत्या कै आरोप

दहेज न लावै पै हत्या कै आरोप

जिला अम्बेडकर नगर, ब्लाक जलालपुर, गांव चिरईपट्टी। हिंआ 29 मई 2016 का एक पच्चीस साल के महरारु कै मउत होइगै। मायके वाले लगाइन हत्या कै आरोप।
गांव वालेन कै कहब बाय कि किशुनदासपुर गांव के जियालाल प्रजापति कै बिटिया प्रियंका कै शादी तीन साल पहिले चितई पट्टी गांव मा रामरतन प्रजापति के साथे भै रहा। साल भर के बाद से दुइनौ पति पत्नी मा बैठत नाय रहा। रोज थोड़ी-थोड़ी बात से झगड़ा हुवत रहा। यही से ऊबके प्रियंका फांसी लगाय लिहिन। एक दुई साल कै बच्ची भी बाय।
मृतिका के महतारी सोनी प्रजापति कै आरोप बाय कि एक महीना पहिले हमरे बिटिया से बीस हजार नइहरे से लावै कै दबाव डालत रहिन। पैसा नाय लाइन तौ हमरे बिटिया कै हत्या कै दिहिन। सूचना पै पहुंची जैतपुर थाना कै पुलिस नायब तहसीलदार विनोद सिंह शव पंचनामा करायके पोस्टमार्टम के ताई भेजिन। मृतिका के चाचा बाबूलाल बताइन कि पति के खिलाफ नामजद तहरीर दियागै बाय।
प्रभारी निरीक्षक एन.के. पाण्डेय कै कहब बाय कि पति रामरतन का हिरासत मा लियागै बाय। अबहीं तहरीर नाय मिली बाय।