खबर लहरिया बुंदेलखंड दस साल से खराब रास्ता

दस साल से खराब रास्ता

IMG_3941जिला महोबा, ब्लाक पनवाडी, गांव महुआ। एते पुखरियापुरा मोहल्ला वार्ड नम्बर एक को रास्ता दसन साल से खराब परो हे। जीसे आये जाये वाले आदमियन खे बोहतई परेशानी आउत हे।
गुलाबरानी, राजकिशोर, रामदुलरिया, गुड्डी ओर उर्मिला ने बताओ कि जा रास्ता से निकरे में बोहत परेशानी आउत हे। जा रास्ता पांच सो मीटर हे जोन गिलाव से भरो रहत हे। काये से हमाय आये जाये के लाने एई मेन रास्ता परत हे। जीमें आज तक न खडण्जा परो ओर न सी.सी. परी आय। बरसात में आधे-आधे पांव गप जात हें। कभऊ रपट के गिर जात हें। हम लोगन ने केऊ दइया प्रधान से कहो हें पे ऊने अभे तक ध्यान नई दओ आय।
प्रधान ईश्वरदास ने बताओ कि ऊ रास्ता एते से पांच सौ मीटर की दूरी पे हे। एई से ऊ ग्राम पंचायत नई आउत आय। एक साल पेहले जिला पंचायत खे प्रस्ताव दओ हतो जो मार्च 2013 के महना में पास हो गओ हे, पे अभे तक कोनऊ ठेकेदार नई मिलो आय। एइ से ऊ नई बन पाई आय। जभे ठेकेदार मिल जेहें तो रास्ता बनवा दओ जेहे।