खबर लहरिया चित्रकूट तीहरे हत्या कान्ड मा मामला दर्ज

तीहरे हत्या कान्ड मा मामला दर्ज

8 मई 2016 का रात मा तीन लोगन के चित्रकूट जिला के पहाड़ी ब्लाक के गांव बरेठी के पास रैपुरवा मजरा धनिया तालाब के किनारे गोलिन से तार कइके हत्या कइ दीन गे।
जेहिमा कलवारा का हरिनारायण यादव लोढ़वारा का पप्पू यादव अउर नहरा का दीपक सिंह का रात मा गोलिन से भून दीन गा। पुलिस का सुबेरे 7 बजे सूचना मिली तौ पुलिस आनन फानन लाश का बिना सील कीने भरवा लाई। हत्या करै मा सबसे बडा हाथ हर्रा गांव के जाने माने डकैत गोपाल उर्फ गोप्पा यादव समेत पांच लोगन के खिलाफ पहाड़ी थाना मा एफ.आई.आर. दर्ज कराई गई है। पुलिस मामले की छानबीन कर रही है। अबै तक मा थाना का एस.ओ के.पी. दुबे का लाइन हाजिर कइ दीन गा है।
नहरा गांव का शिवशंकर सिंह कहिस कि 26 अप्रैल का कलवारा के मुन्ना गौतम के हिंया से फतेहपुर जिला से बारात आई रहै। जेहिमा बरेठी के पास रात मा बारातिन के लाईसेन्सी बन्दूक छीन लीन गे। वहै समय गोलिया चली जेहिमा एक मड़ई घायल होइगा। यहिके एफ.आई.आर.पहाड़ी थाना मा दर्ज कराई गे,पै बन्दूक नही ढूढ़ पाइस। यहिमा कलवारा के हरिनारायण, लोढ़वारा गांव के पप्पू यादव का कुछ रुपिया लइ दइके बन्दूक ढूढै़ का कहा गा। पप्पू यादव पुलिस का मुखबिर रहै। इं दूनौं 8 मई का हमारे घर शाम 6 बजे आय अउर मोर भाई दीपक का शाम 7 बजे या कहिके लइगेें कि ममसी गांव काम से जाये का हवै। यहिके बाद फोन लगावा तौ एक बार रिंग गई। यहिके बाद मा फोन स्वीचआफ बतावैं लाग। सुबेरे पुलिस का फोन आवा के तीन लोगन के हत्या होइगे। पुलिस के कहै मा 6 लोगन के खिलाफ एफ.आई.आर.दर्ज कराई। पुलिस कउनौ का नहीं पकड़िस।
थाना अध्यक्ष रावेन्द्र तिवारी का कहब हवै कि धारा 147 (बल्वा करब)148(बल्वा करै खातिर सजा)149(अपराध खातिर दोषी)302(हत्या) 34 आई पीसी लाग हवै। मामला के अबै छानबीन चलत हवै।

रिपोर्टर – कविता और नाजनी रिजवी