जिला चित्रकूट, ब्लाक रामनगर, गांव खण्डेहा 25 अक्टूबर का ट्रैक्टर चलावै वाले राम बाबू के मउत होइ गे हवैं। जेहिमा ट्रैक्टर मालिक वहिके परिवार का 20 हजार रुपिया दे का कहत हवै।परिवार वाले पुलिस मा रपट नही लिखाइन आहीं।
राम बाबू का भाई बुद्धूराम बताइस कि दुसरे का सामान लइके वा ट्रैक्टर चलावै गा रहै। कहत रहै शाम तक आ जई। पै वहिके एक्सीडेंट मा मउत होइगे हवै।ट्रैक्टर मालिक 20 हजार रुपिया दइ के समझौता करे का कहत हवैं पै हम समझौता न करबै।
रामबाबू के मेहरिया रामकली बताइस कि हम फोन लगावा रहा हवैं तौ दूसर मड़ई फोन से बताइस कि ट्रैक्टर चलावे वाले के मउत होइ गे हवैं। या सुन के हमार हालत खराब होइ गे। हम तुरतै घटना के जघा मा गयेन।
ट्रैक्टर मालिक हेमराज बताइस कि रामबाबू ट्रैक्टर चलावत रहै अउर पूर मालिक रहै। जहां मन होत रहै हुंवा ट्रैक्टर लइ जात रहै। वापिस लउटत समय घटना भे हवै। तबै हम घटना के जघा मा जा के पोस्टमार्टम कराये हन। वहिके परिवार वाले समझौता करे मा ज्यादा रुपिया मांगत हवैं।
रैपुरा थाना के मुन्शी लाल भइया बताइस कि मौका मा जा के पोस्टमार्टम कराये हन। अबै परिवार वाले रपट नहीं लिखाइन हवैं।
रिपोर्टर- सहोद्रा
29/10/2016 को प्रकाशित
