जिला बांदा, ब्लाक तिन्दवारी। तिन्दवारी से बगिया जाय वाली सड़क मा छिरौंटा गांव के पास का रपटा 2005 मा बना रहै। या रपटा हर साल टूट जात है जेहिमा कइयौ मउत भी होई चुकी हैं। पी.डब्लू.डी विभाग हर साल मरम्मत करा देत है। सितंबर महीना मा फेर से टूट गा है।
छिरौंटा गांव के सत्यनारायण, माला, बाला प्रसाद अउर सत्तीदीन का कहब है कि या पार वा पार जाय खातिर पानी मा हिल के आवत जात हैं। या समस्या एक महीना से लगातार बनी है, पै विभाग कउनौ ध्यान नहीं देत आय। रपटा टूटैं से 2013 मा कमलेश यादव का लड़का, भदवारी पाल का लड़का, छोटकू का घोड़ा अउर भदवारी पाल के घोड़ा के मउत होइगे रहै। तबै से ही पी.डब्लू.डी. विभाग से लइके मुख्यमंत्री तक का बड़ा पुल बनैं खातिर दरखास भेजी गे रहै।
पी.डब्लू.डी खण्ड दुई के जेई सुरेन्द्र कुमार का कहब है वा रपटा का मरम्मत करैं खातिर मटेरियल गिरवा दीन जा चुका है। जल्दी काम शुरू कीन जई। यहिके बाद या रपटा मा बड़ा पुल बनैं खातिर प्रस्ताव भेजा जई।