विशेष पखवारा में आयल अधिकारी
जिला सीतामढ़ी, प्रखण्ड सोनबरसा के प्राथमिक स्वास्थ्य केन्द्र में 11 जूलाई से 30 जुलाई 2014 तक विशेष पखवारा लागल रहई। जेई में ऐई बेर चार सौ तीन महिला के काॅपर-टी लगाके जिला स्तर पर रिकाॅर्ड तोड़ देलई। जबकि जिला से एक सौ पचास काॅपर-टी लगावे के आंकड़ा देल गेल रहलई।
आशा प्रभारी सर्वानन्द पाण्डेय कहलथिन कि ऐई कार्यक्रम के सफल बनावे के लेल आशा कार्यकर्ता अउर ए.एन.एम. बहुत ही मेहनत कलथिन। उनका सब के लक्ष्य देल गेल रहलई। ऐई शिविर के आयोजन तेरह सेन्टर पर कयल गेल रहलई। स्वास्थ्य मैनेजर विनय भूषण कहलथिन कि काॅपर-टी के अलावा तीस महिला के बंध्याकरण, सात सौ पैतालीस बालिग युवा-युवती के काॅण्डम अउर एक सौ तीरसठ गर्भ निरोधक गोली भी देल गेलई। ब्लाॅक एकाउन्टर मैनेजर नीरज के कहना हई कि ऐई कार्य में सफलता मिलला पर प्रत्येक सेन्टर पर हम जाके प्रति पेसेन्ट पर एक सौ रूपईया प्रोत्साहन राशि सब आशा के जोड़ के वितरण कईली।
काॅपर-टी प्रभारी अभिषेक कुमार कहलथिन कि पिछले साल तेरासी काॅपर-टी लागल रहई। लेकिन ऐई साल त रिकाॅर्ड तोर देलई। ऐईमें स्वास्थ्य कार्यकर्ता बहुत काम कलथिन। पिछले चार साल के लगातार प्रयास के द्वारा ही ऐई साल सफलता हासिल होलईय।