खबर लहरिया चित्रकूट जांच मा सही पावा गा

जांच मा सही पावा गा

प्रेमचन्द्र निषाद

प्रेमचन्द्र निषाद

जिला चित्रकूट, ब्लाक रामनगर, गांव सिरावल पुरवा सिलौटो। हिंया के प्रधान प्रेमचन्द्र निषाद बताइस कि नहर का प्राइवेट चैकीदार रामअभिलाष हवै। वा लोहे का पुरान सामान 26 नवम्बर 2013 का चोरी से बेंचै जात रहै। वहै समय प्रधान प्रेमचन्द्र निषाद तुरतै मऊ थाना मा फोन कइ दिहिस। यहै से वा पकड़ गा।
प्रधान प्रेमचन्द्र निषाद का कहब हवै कि रामअभिलाष का रंगे हाथ पकड़ लीन गा हवै। वा प्राइवेट चैकीदारी करत हवै। लोहे का सामान जीप मा भर के बेंचैं जात रहै। जबै मैं देखेंव तौ थाना वालेन का सूचना दीनेंव। थाना के पुलिस तुरतै आई अउर वा मउके मा पकड़ गा।
रामअभिलाष का कहब हवै कि नहर विभाग का जेई श्रीपाल कहिस रहै कि जउन खराब सामान हवै वहिका जीप मा धइके मऊ सामान लइ आव। यहै से सामान लइके जात रहौं। मड़ई समझिन कि वा चोरी से सामान बेंचै जात हवै। मैं इनतान का काम कत्तौ नहीं कइ सकत हौं। काहे से कि मैं प्राइवेट चैकीदार हौं।
जेई श्रीपाल से बात करैं के कोशिश कीन गे, पै बात नहीं भे आय।
मऊ थाना के छोट दरोगा हरिशरण यादव का कहब हवै कि या बात सही आय कि जेई पुरान सामान बेंचैं का चैकीदार से कहिस रहै अउर मऊ मा बोलाइस रहै। यहै से वा जीप मा भर के सामान लइ जात रहै।