जिला महोबा, ब्लाक जैतपुर, कस्बा कुलपहाड़ टोरिया पुरा मोहल्ला के रामसहाय को आरोप हे की मोहल्ला के छोटेलाल ने लमीन मे दबरजस्ती कब्जा कर लओ हे। ईखी दरखास 17 मई खा तहसील दिवस मे दरखस दई हे।
रामसहाय कहत हे की जा जमीन हमाये पुरखन की आये। मोये तीन बच्चा हे। ई साल सूखा ओर गरीबी के कारन हम बाहर मजदूरी करन चले गये हते। घर मे कोनऊं न हांय के कारन छोटेलाल ने मोई जमीन मे शौचालय को गड्ढा खोद लओ हे। जा बात हमें मोहल्ला के आदमियन ने फोन से बताओ। एक महीना पेहले हम दिल्ली से वापस आये। हमने कहो तो लड़ाई झगड़ा करत हे। ईखी दरखास मेने 17 मई खा तहसील दिवस मे दई हे। नगर पालिका मे भी कहो हतो। पे हमाई कोनऊ नई सुनत हे।
छोटेलाल की ओरत गुड्डो कहत हे की जित्ती जमीन हमाई बाहर छूटी हती। ओई हिसाब से हमने गड्ढा खोदो हे। रामसहाय खुद हमाई जमीन मे कब्जा करे हते।
नगर पंचायत कुलपहाड़ की चेयरमैर विमला देवी को आदमी गोपीबाबू कहत हे की ऊखी जमीन मे छोटेलल ने शौचालय को टैंक बना लओ हे। टैंक के ऊपर रामयहाय आपन निस्तार कर सकत हे।
तहसीलदार राम जी कहत हे की अभे तक कोनऊ दरखास नई आई हे। अगर आहे तो लेखपाल खा भेज के जांच कराई जेहे। अगर जांच मे सही पाओ गओ तो पुलिस की सहायता से छोटेलाल के ऊपर कारवाही करी जेहे।
रिपोर्टर – श्यामकली