खबर लहरिया औरतें काम पर छेड़खानी को नई लिखत मुकदमा

छेड़खानी को नई लिखत मुकदमा

m Charkhari - Kharela Thana mahila mudda khabar (1)जिला महोबा, ब्लाक चरखारी, थाना खरेला क्षेत्र के एक गांव के महिला को आरोप हे की पांच महीना पेहले गांव के ही राजेन्द्र पुत्र लल्लू धोबी ने छेड़खानी करी हती। जीखी दरखास खरेला थाना ओर महोबा एस.पी. खा दई हती। पुलिस रोजन्द्र खा पकर के छोड़ दओ हे। में न्याय के लाने थाना, कोतवाली, सी.ओ. एस.पी के चक्कर काटत हों पे कोनऊ सुनवाई नई होत हे। अपराधी खुले आम घूमत हे।
ओरत बताउत हे की पांच महिना पेहले मे शाम 6 बजे गांव के बाहर टट्टी होन गई हती। तभई राजेन्द्र दो दइयां ऊ गली से निकरो। मेने सोचो की मेन रास्ता हे आदमी निकरत हे। ऊखे बाद मे जभे सूनसान रास्ता देखी तो मोये एते आओ ओर हाथ पकर लओ। मे जोर से चिल्लनी ओर जल्दी से आपन हाथ छुड़ा के भगी ओर घरे आई। मोओ आदमी महोबा गओ हतो। राजेन्द्र मोये द्वारे में गाली गलौज करन लगो। मेने फोन करके अपने आदमी खा बताओ, जभे मोओ आदमी महोबा से आके राजेन्द्र के घर उलाहना देन गओ तो बाप बेटा लड़े खा तैयार हो गये। ईखी दरखास हम सुबेरे खरेला थाना देन गये। अभे तक कठू कारवाही नईं भई। आये दिल गाली गलौज करत हे।
खरेला थाना के दरोगा बताउत हे की जीखे ऊपर ऊ ओरत छेड़खानी को आरोप लगाउत हे। ऊ पागल हे, एई से मुकदमा नई लिखो हे। लड़का को बाप लल्लू ऊ लड़का खा इलाज के लाने ग्वालियर में भर्ती करे हे।