खबर लहरिया बाँदा छात्रवास मा नहीं बनत खाना

छात्रवास मा नहीं बनत खाना

b avasiy vidyalay kasba seजिला बांदा। कांशीराम कोलोनी हरदौली के बगल मा चलै वाला राजकीय आश्रम पद्वति इण्टर कालेज के छात्रवास मा दुई महीना से ताला बंद है। परेशान बच्चा 23 नवम्बर का डी.एम. का दरखास दें आय रहैं। डी.एम. के न मिलैं मा छात्र प्रशासनिक अधिकारी सईद अहमद का दिहिन।
कक्षा नौ मा पढ़ै वाले सौरभ (लामा) जितेन्द्र प्रताप (टिकरी कनवारा) उमेश कुमार (जमालपुर) कक्षा दस का सोनू (जमालपुर) के साथै जितेन्द्र कुमार, रिषभ अउर अजय भी शामिल रहैं। सौरभ बताइस कि 20 अक्टूबर से विद्यालय मा खाना भी नहीं दीन जात आय। यहिकर कारन हम होंआ के अधीक्षक से पूंछा तौ सही जानकारी नहीं देत आय। बोर्ड के परीक्षा आवैं वाली है। पढ़ाई न होई हम बोर्ड के परीक्षा से रही जइबे। इनतान मा पंजीकृत चार सौ तीस बच्चन का भविष्य खराब है।
समाज कल्याण अधिकारी कृष्ण कुमार सिंह का कहब है कि उनके विभाग से संचालित विद्यालय मा ताला बंद होय के जानकारी मिली है। खाना बनावैं का ठेका हमीरपुर जिला के रश्मि ट्डर्स फर्म के हाथ है। वा भी दुई पार्टनर के बीच ठेका है। दूनां के बीच कुछ बात का लइके विवाद होइगा तौ दूनौं काम छोड़ के चले गे रहैं। दुई दिन पहिले एक ठेकेदार आवा रहै तौ गल्ला धई गा है। वहिके बाद से नहीं आवा। अब डी.एम. के आदेश से दूसर ठेकेदार के व्यवस्था कीन जई।