चेक मा प्रधान नहीं करत दसखत

जिला बांदा, ब्लाक तिन्दवारी, गांव बरेठी कलां। या गांव के प्राथमिक विद्यालय मा खाना बनावैं वाली औरतन का आरोप है कि प्रधान उनके मानदेय वाली चेक मा दसखत नहीं करत आय। यहिसे उंई बहुतै परेशान हैं।
गांव के चन्दा अउर सहोद्रा का कहब है कि हम पांच साल से प्राथमिक विद्यालय मा खाना बनाइत हन। हम लोगन के मानदेय के चेक मास्टर दुई महीना पहिले दई दिहिस रहै, पै प्रधान उनमा दसखत नहीं करत आय। या मारे हम लोग आपन रूपिया निकारैं खातिर भटकत हन। एक तौ मानदेय भी जल्दी नहीं आवत दूसर प्रधान के चक्कर लगावैं का परत है।
हेडमास्टर शिवहरे का कहब है कि मै 20 मई का प्रधान का स्कूल मा बुला के दसखत करैं का कहे रहौं, पै व मोहिका खुदै गाली देत रहा है।
प्रधान बिन्दा वर्मा का कहब है कि मैं मास्टरन के कहे से दसखत न करिहौं। खाना बनावैं वाली मोरे घरैं आवैं अउर दसखत करा लई जाय।

रिपोर्टर –  शिवदेवी