जिला चित्रकूट, शहर चित्रकूट पंडित दीनदयाल उपाध्याय अउर नाना जी देशमुख के जयंती मा खेलकूद प्रतियोगिता कीन गे हवैं। 25 से 27 सितम्बर का चित्रकूट जिला के दीन दयाल शोध संस्थान सुरेन्द्रपाल ग्रामोदय विद्यालय मा प्रतियोगिता कीन गे हवैं। जेहिमा अलग अलग जघा से पांच सौ स्कूलन के बच्चा आय हवैं। कबड्डी, खो खो, बालीवाल, लम्बी कूद, ऊँची कूद, गोला फेंक अउर दौड़ खेल के प्रतियोगिता कराई गे हवैं।
संयोजक संतोष कुमार का कहब ह्वै कि या प्रतियोगिता ग्रामीण इलाकन के बच्चा खातिर कराई गे हवैं। जेहिसे गांवन के बच्चन का पूर विकास होइ सकै। यहै कारन गांव के बच्चन का भी मउका दीन गा हवै कि उई भी आपन विकास करै। खेलाडिन का तीन ग्रुप सीनियर, जूनियर अउर मिनी मा बांटा गा हवै।
खेले वाले लड़का महेंद्र कुमार बताइस कि 400 मीटर दौड़ मा वहिका प्रथम स्थान आवा हवै। यहै कारन वहिका ईनाम मिला हवै।
आशीष बताइस कि वा पहली दरकी खेलिन हवै। जेहिमा 100 मीटर दौड़ मा प्रथम आवा हवै।
कुलदीप अउर जितेन्द्रका कहब हवै कि कबड्डी मा हमें पहिला स्थान मिला हवैं। अनन्त लाल बताइस कि वहिका 200 मीटर दौड़ मा दूसरा स्थान मिला हवै।
रिपोर्टर- सुनीता
03/10/2016 को प्रकाशित
