जिला चित्रकूट, ब्लाक मऊ, गांव टिकरा टोला। हिंया 17 जनवरी का लवलेश का चार भाई मिल के कुल्हाड़ी से काट डालिन हवैं। हत्या जुंआ खेले के कारन भें हवैं। हत्या के चार अरोपिन मा दुइ आरोपी पकड़ गे हवैं,दुइ अबै भी फरार हवैं।
लवलेश का मामा सुनील कुमार बताइस कि जुंआ खेलत समय रुपियन का विवाद होइ गा रहै । घर के भीतर घुस के चारों भाई लवलेश का जान से मार डालिन हवै। वहिके बाप अउर भाई का भी मारिन हवैं।
भाई रज्जू बताइस कि हम अपने भाई का भीतर बेड़ लिए रहे हन, पै चारों दीवार डांक के घर के भीतर घुस भाई आये हवै अउर मोर भाई का मार डालिन हवैं। लाठी, डंडा अउर कुल्हाड़ी से हमें मारिन हवैं।
बाप छंगूलाल बताइस कि हमें उंई खूब मारिन हवै , लवलेश का तौ जान से मार डारिन है पै मोर खपरी फूट गे हवै। महतारी प्रेमा बताइस कि जुआ मा पांच रुपिया के विवाद के कारन उंई मोर लड़का का जान से मार डालिन हवैं।
मेहरिया गीता बताइन कि मैं घटना के समय होतिव तौ अपने मनसवा का बचावै के कोशिश करतिव । मऊ के दीवान इन्द्रपाल सिंह हत्या के चार अरोपिन मा दुइ आरोपी उमेश अउर लाला का पकड़ लीन गा हवैं हत्या मा शामिल लाठी बरामद कइ लीन गे हवै।
रिपोर्टर- सुनीता
Published on Jan 24, 2017
