चित्रकूट में कर्वी डाकखाने में सफाई कर्मी के फॉर्म जमा नहीं हुए क्योंकि डाक टिकट नहीं मिले

जिला चित्रकूट, ब्लाक कर्वी, डाक खाना 22 अगस्त का सफाई कर्मी का फारम जमा करै का रहै। यहिसे मड़ई डाकखाना मा टिकट लें खातिर गें रहैं। उनका डाकखाना से टिकट नहीं दीन गा। ऊपर से डाकखाना वाले धक्का दइके बाहर निकार दिहिन। यहिसे लोगन का फारम नहीं जमा भा आय।
रेखा का कहब हवै कि मैं दस बजे से डाकखाना मा बइठ हौं। छोट से लड़की हवै। सफाई कर्मी का फारम भरे रहौं। हिंया टिकट लें का रहै,पै डाकखाना के लोग टिकट नहीं देत आहीं। कहत हवैं कि हिंया टिकट नहीं आय। या कहिके भगा दिहिन हवैं। भोला सिंह पटेल का कहब हवै कि मैं सफाई कर्मी के नौकरी करै चाहत हौं। या कारन से सफाई कर्मी का फारम भरे हौं। मोर पूर कागज तैयार हवैं। बस डाकखाना से टिकट लइके लगावैं का हवै। यहिसे टिकट लें खातिर आय हौं। सहरुम मोहम्मद कहिस कि हिंया फारम जमा करै का रहैं। डाकखाना वाले टिकट नहीं दिहिन। उल्टा लोगन का भीतर बंद कइके ताला लगा लिहिन। यहिके बाद पुलिस का बोलवा के डाकखाना से बाहर निकरवा दिहिन। या सोंच के सफाई कर्मी का फारम भर दीने रहौं कि अगर नौकरी लाग जई। यहिनतान गुिड़या कहिस कि सफाई कर्मी का फारम भर दीने रहौं,पै का पता रहै कि हिंया टिकट खातिर इनतान होइ। कर्वी डाकखाना के पोस्ट मास्टर सुशील कुमार कहिन कि टिकट के सप्लाई नहीं भे आय। यहिसे लोगन का टिकट नहीं दीन गा हवै। अगर जउन लोग इनतान कहत हवैं कि टिकट नही दीन जात। या बात गलत आय।