जिला चित्रकूट, कस्बा कर्वी, मुहल्ला मुलायम नगर ढाई साल के सुहाना बानौ का टयूमर के बीमारी हवै। गरीबी के कारन वहिके परिवार वाले वहिकर इलाज नही करवा पावत आहीं। यहिके लाने उंई डी. एम. से मदद मांगिन हवैं। पै सरकारी विभाग से कउनौ मदद नहीं मिली आय। तबै चाइल्ड केयर नाम के संस्था सुहाना बानो के इलाज मा मदद करत हवैं।
सुहाना के दादी नूरजहाँ का कहब हवै कि सुहाना जबै डेढ़ साल के होइगे हवै, तबै हमें या बीमारी के पता चला हवै। मोर नातिन के हाथ पांव अउर पूर शरीर सूखत चला जात हवैं अउर पेट निकलत चला आवत हवैं। डाक्टर सुहाना का ट्यूमर के बीमारी बताइन हैं। हम गरीब होय के कारन वहिकर नीकतान इलाज नहीं करा पाये हन। यहै कारन डी. एम. से मदद मांगे हन, पै हुंवा से भरोसा बस मिला हवै। तबै चाइल्ड केयर के अभिमन्यु हमार मदद करिन हवै। हमार नातिन सुहाना का इलाज करावत हबैं। चाइल्ड केयर के कार्यकर्ता अभिमन्यु का कहब हवै कि सुहाना के जाँच कीन गें रहै अब इलाज चलत हवै वहिका इलाज से आराम मिलत हवैं। रुपिया का इंतजाम कीन गा हवैं।
चाइल्ड केयर कौशनर बीनू का कहब हवै कि सुहाना का सरकारी अस्पताल मा इलाज खातिर लइ गये रहेन पै हुंवा से वापिस कइ दीन गा गा हवै। अब सतना मा इलाज चलत हवै। जिलाधिकारी, बाल कल्याण विभाग मा मदद खातिर चिठ्ठी लिखी गे हवैं। पै हुंवा से कुछौ मदद नहीं मिली आय फेसबुक मा मदद खातिर सबका बतावा गा हवैं। अच्छे मड़ई इलाज खातिर रुपिया दिहिन हवैं। हम मदद बस करित हन।
रिपोर्टर- नाजनी रिजवी
