खबर लहरिया चित्रकूट चित्रकूट जिले का राजन 30 अक्टूबर से है गायब, पुलिस भी अब तक पता नहीं लगा पायी है

चित्रकूट जिले का राजन 30 अक्टूबर से है गायब, पुलिस भी अब तक पता नहीं लगा पायी है


चित्रकूट जिला के सब्जी मंडी से 30 अक्टूबर का कक्षा पांच मा पढ़े वाला राजन गायब होइ गा रहै। एक महीना बादौ पुलिस वहिका नहीं ढूढ़ पाई आय।राजन जयप्रकाश नारायण सर्वोदय विद्यालय मा पढ़त रहै अउर छात्रावास मा रहत रहै। दीपावली के छुट्टी मा आपन घर आवा रहै। राजन के बाप राजू का कहब हवै कि मैं आपन लड़का का स्कूल के लगे उतार दीने रहें हौं पै वा पता नहीं कहां चला गा हवै। स्कूल से पता लाग कि वा स्कूल नहीं आवा आय। काहे से स्कूल के रजिस्टर मा वहिके दसकत नहीं रहें आहीं।राजन के महतारी सुनीता बताइस कि जबै बच्चा खो गा हवै तौ वहिके दस दिना बाद थाना मा रपट लिखायें हन पहिले हम सोंचत रहेंन कि राजन यहिने आस-पास होइ तौ आ जई पै वा नहीं आवा।स्कूल के प्रभारी अधिक्षक कपिल त्रिपाठी का कहब हवै कि छुट्टी मा जबै बाप महतारी आवत हवैं तौ बच्चन का भेजा जात हवै।जबै बच्चा वापस आवत हवै। तौ बाप महतारी बच्चा का छोड़े आवत हवैं अउर रजिस्टर मा दसकत करत हवैं। तबै हमार जिम्मेदारी बनत हवै। मऊ थाना के सीओ.विनीत सिंह का कहब हवै कि जांच चलत हवै स्कूल के बच्चा बताइन हवै कि राजन कहत रहै कि वहिकर पढ़े मन नहीं लागत आय वा स्कूल छोड़ के चला जई। राजन के लगे मोबाईल हवै जबै कुछौ सूचना मिली तौ टीम भेजी जई।
रिपोर्टर-सुनीता देवी

Published on Dec 4, 2017