जिला चित्रकूट, ब्लाक मानिकपुर, गांव कौबरा मार्च के महीना मा पंकज परीक्षा दे गा रहै पै दूसरे दिन वहिके लाश बेलऊहां के खेत मा पड़ी रहै। पोस्टमार्टम रिपोर्ट के बाद पता चली कि पंकज के हत्या भे हवै, कि आत्महत्या कर लिहिस हवै।
पंकज का बाप सीताराम बताइस कि पंकज सुबेरे 9 बजे चाचा के साथे बोड़ी पोखरी परीक्षा दे गा रहै। ढाई बजे तक वहिकर मोबाइल चालू रहै। तीन बजे बंद होइ गा हवै। दूसरे दिना बेलऊहां के खेत मा वहिकर लाश मिली हवै। लाश के लगे मोबाइल अउर वहिके बैटरी अलग-अलग पड़े रहै। लाश मा कउनौ चोट के निशान नहीं रहै। हमार कउनौ से दुश्मनी नहीं रहि आय। पोस्टमार्टम के बाद डाक्टर कहत हवै कि पंकज के शरीर से जहर मिला हवै।
जीजा सुधीर यादव का कहब है कि अस्पताल मा जांच कीन गे रहै तौ शरीर मा कउनौ चोट के निशान नहीं पायें गे आही।महतारी सावित्री चाचा सालिकराम अउर दादी, सुन्दी बताइस कि पूर परिवार का दुलारा लड़का रहा कुछौ पान श्री कुछौ नहीं खात रहै। बुआ सुनीता बताइस कि जहां लाश पड़ी रहै हुंवा कउनौ नहीं जात रहै हुंवा तार बंधी रहत हवैं। वा जहर खात तौ कुछौ सुनाई तौ पड़त पै कुछौ सुनाई नहीं पड़ा आय। जांच होइ जइ तौ पता रहै कि वहिकर मउत कसत भे हवै।
पुलिस का कहब हवै के पोस्टमार्ट के रिपोर्ट के बाद पता चली हत्या आय की आत्महत्या करिस हवै।
रिपोर्टर- सहोद्रा
07/04/2017 को प्रकाशित
