खबर लहरिया चित्रकूट चित्रकूट के मऊ बस स्टैंड में गंदगी की भरमार है

चित्रकूट के मऊ बस स्टैंड में गंदगी की भरमार है

जिला चित्रकूट, ब्लाक मऊ क़स्बा बस अड्डा अउर सब्जी मंडी का नजारा बहुतै गन्दा हवै। काहे से हिंया रखा कूड़ादान पूरा भरा हवै। वहिके लगे कूड़ा का ढेर पड़ा हवै। जेहिसे गंदगी फइलत हवै। पै प्रधान कउनौ ध्यान नहीं देत हवै। जेहिसे आवै जायै वाले मडइन का बहुतै परेशानी होत हवै। साथै सब्जी मंडी मा रहै वाले हजारन मड़ई परेशान हवैं।
सच्चिदानंद बतावत हवै कि आवै जाये वाले मड़इन का या फइले कूड़ा से बहुतै परेशानी होत हवै तौ हम का करी? गोविंद कहत हवै कि दुइ तीन दिन मा कूड़ादान भर जात हवै तबहूं मड़ई कूड़ादान मा कूड़ा फेंकत हवैं।जेहिसे हुंवा गंदगी फइलत हवै। मच्छर लागत हवैं।
अजय अउर कल्लू बतावत हवैं कि सब्जी बाजार मऊ मा एक महीना पहिले कूड़ादान रखा गा रहै। दुइ तीन दिन मा कूड़ा भर जात हवै तौ रामलीला मैदान मा कूड़ा फेंक दीन जात रहै। पै अब पन्द्रह दिन से यहिनतान कूड़ा भरा पड़ा हवैं। जेहिसे सगले गंदगी फइलत हवैं। अउर मड़ई बीमार पड़त हवैं। कूड़ादान भरे के बाद मड़ई एक दूसरे के घरन के सउहें कूड़ा फेंकत हवैं जेहिसे लड़ाई झगडा तक होइ जात हवै।
प्रधान रश्मि के मनसवा अमित का कहब हवै कि अपने कइत से प्राइवेट सफाई करमचारी रखे हौं। दुइ सरकारी करमचारी हवैं, पै उंई सगले सफाई नहीं कइ पावत हवैं। सफाई खातिर डी एम का लिखित दरखास दीनेहौं।

रिपोर्टर- सुनीता और सहोद्रा

13/10/2016 को प्रकाशित