राजू को बिलखत परिवार
महोबा जिला में भये अलग-अलग एक्सीडेन्ट से चार आदमियन की मोत भई हे। पुलिस ने 27 अगस्त 2013 खा एकई साथ पंचनामा भर पोस्टमार्टम खा भेजो हे।
जिला हमीरपुर तहसील सरीला गांव इन्द्रपुरा। एते को देशराज महोबा में कजली मेला देखे आओ हतो। 26 अगस्त 2013 खा रात में मोटर साइकिल से जात हतो। तभई पछाऊं से ट्रक वाले ने धक्का मार दओ। जीसे जितेन्द्र की मोत हो गई। ड्राइवर ट्रक छोड़ के भाग गओ हे।
एसई पनवाड़ी ब्लाक के महोबकण्ठ गांव में मोटर साइकिल से ओर ट्रेक्टर से एक्सीडेन्ट भओ हे। जीमे राजेन्द्र ओर ऊखी मौसी मीरा की मोत हो गई हे। चरखारी ब्लाक के सूपा गांव को राजू अहिरवार राजेन्द्र ओर मीरा खा देखे आउत टैम्पू से गिर के मोत हो गई हे।
सूपा गांव के बलवान ने बताओ कि राजू की मौसी रक्षाबन्धन में तेइया गांव से सूपा आई हती। 26 अगस्त 2013 खा राजेन्द्र मीरा खा तेइया गांव छोड़े जात हतो। जीसे महोबकण्ठ थाना के एते मोटर साइकिल ओर ट्रेक्टर एक्सीडेन्ट से दोनऊ की मोत हो गई। ऊखो लाश को पंचनामा ओर पोस्टमार्टम खा महोबा आउत हते। उनई खा देखे राजू सूपा से महोबा आटो से आउत हतो। तभई राजू आटो से गिर गओ, ऊखे दिमाग में चोट आ गई हती। ऊखे अस्पताल लाउत-लाउत रास्ते में मोत हो गई। जीसे ऊखे परिवार में दुख को माहोल छाओ हे। 27 अगस्त 2013 खा पुलिस ने चारऊ लाशन को पंचनामा भर पोस्टमार्टम खा भेजी हे।
महोबा कोतवाली के कांस्टेबिल श्रीराम ने बताओ कि अगर ऊखे परिवार वाले कोतवाली में आके तहरीर दें तो मुकदमा लिखो जेहे, ओर कारवाही भी करी जेहे।
