बिजली की बताउत समस्या
जिला महोबा, ब्लाक जैतपुर, कस्बा कुलपहाड़। एते के हटवारा मोहल्ला में ग्यारह हजार वोल्टेज वाली बिजली की लाइन आदमियन के घरन के ऊपर से निकरी हे, जीसे कभऊं भी कोनऊ घटना हो सकत हे। एई से आदमियन ने 20 जनवरी खा तहसील दिवस एस.डी.एम. खा दरखास दई हे।
जयन्ती ने बताओ कि हमाये केऊ पीढ़ी के घर बने आये। पेहले कच्चे घर हते, पे अब पक्के घरन के ऊपर से ग्यारह हजार वाली लाइन निकरी हे, जीसे आय दिन करंट लागत हे। प्रकाशरानी ने बताओ कि 1 जनवरी खा बिजली को तार टूट गओ हतो, जीसे पूरे घरन में करंट फेल गओ हतो। ईखी सूचना हमने बिजली विभाग में दई हती। मुबीना खातून ने बताओ कि नौ साल पेहले एई लाइन में बिजली के करंट लागे से मोओ एक लड़का खत्म हो गओ हे। 16 जनवरी खा मोई बिटिया रेशमा छत में कपड़ा लेन गई तो करंट लग गओ हतो। इस्लामउद्दीन ने कहो कि हमने केऊ दइयां बिजली विभाग में लिख के दरखास दई हे।
कुलपहाड़ बिजली विभाग के जे.ई. एस.के. कुशवाहा ने आदमियन की गलती बता के कहो कि ओते पेहले से लाइन निकरी हे। आदमियन ने बाद मे घर बना लये हे। बस्ती के आदमी पूरो लाइन हटवाये को खर्चा देय, ओर शासन से आदेश आहे तो लाइन हटावाई जा सकत हे।