चित्रकूट जिला मा 1 मई 2016 का समाजवादी पाटी ने उत्तर प्रदेश सरकार के काम के जानकारी बतावै खातिर गांव गांव साइकिल यात्रा निकारिन हवै। या यात्रा 10 मई 2016 तक जिला मा चलत रही। यात्रा के शुरूवात हर ब्लाकन से किन गा हवै। कर्वी ब्लाक को यात्रा का हरी झंडी देखावै मा वरिष्ठ नेता नरेन्द्र गुप्ता,विधायक वीर सिंह बउर र्पाअी के लोग शामिल रहै।
यहिनतान मऊ, रामनगर, मानिकपुर, अउर पहाड़ी ब्लाकन मा भी साइकिल यात्रा के हरी झंडी देखाई गे। साइकिल मा लाल डंडा, खोपड़ी मा लाल टोपी जेहिमा अखिलेश के फोटो लाग रहै। इं पंचे गांव गांव जाके मड़इन का बतावत हवै कि समाजवादी पार्टी के सरकार मा बहुतै काम भा हवै। आये वाले 2017 मा फेर से ध्यान दीनेव।
या मामला मा गांव के कुछ लोगन का कहब हवै कि हम गरीब तौ पहिले भी भूखे रहत रहेन। आज भी वहै हाल हवै। हमका तौ नहीं लागत कि सरकार कुछौ नीक काम करिस हवै। सरकार अगर करतौ हवै तौ बीच के मड़ई खा के बइठे जात हवै। हम गरीबन तक खाना नहीं पहुचत आय। कुछ मेहरिया बताइन कि सरकार हमका समाजवादी पेंशन नहीं देत हवै। हम गरीबन का काहे नहीं सुनवाई होत आये। अगर सरकार के मड़ई गांव गांव मा मीटिंग करत हवै तौ हमार कहे नहीं सुनवाई होत आय। कुछ मड़ई कहिन कि 2017 मा चुनाव होये का हवै। या कारन से सब देखावा कीन जात हवै जीतै के बाद हम सब का सरकार पलट के नहीं देखत आय। या समय तौ सूखा से मड़ई अउर जानवर खाना पानी खातिर तड़पत हवै। उनका बइठक करै अउर सुनै के फुरसत कउनौ का नहीं आय। कर्वी, बैहार गांव के समाजवादी पार्टी के चुन्नीलाल कहिस कि एक गांव मा पूर एक दिन लाग जात हवै। मैं साइकिल तो नहीं चला पावत हो। काहे से कि मोर उम्र या समय लगभग पचपन साल के हवै। मैं तौ पैदल गांव मा चल के पार्टी द्वारा चलाई गे योजना के बारे मा मड़इन का बतावत हौं। जेहिसे उंई लाभ लइ सकैं।
रिपोर्टर – मीरा जाटव, तबस्सुम