खबर लहरिया बाँदा खराब सड़क, पुलिया टूटैं से परेशान मड़ई

खराब सड़क, पुलिया टूटैं से परेशान मड़ई

IMG2736Aसड़क अउर पुलिया खराब होय के कारन मड़इन का आवै जाय मा बहुतै परेेशानी है। मड़ई पी.डब्लू.डी. विभाग से समस्या मा सुधार करैं के मांग करिन हैं।
जिला बांदा, ब्लाक महुआ, कस्बा खुरहण्ड। खुरहण्ड से गिरवां तक के साढ़े नौ किलोमीटर सड़क 2011 से खराब पड़ी है। कुछ मड़ई बताइन कि या सड़क से मोरंग अउर गिट्टी से भरे ओवर लोड ट्रक रात दिन चोरी से निकरत हैं। इं ट्रक शेरपुर खदान से भर के आवत हैं।
पी.डब्लू.डी. भाग एक के सहायक अभियंता सत्यपाल सिंह कहिन कि 31 मार्च 2012 से या सड़क के सुधारैं का बजट नहीं आवा आय। या सड़क का सुधारैं खातिर 1174.03 लाख रूपिया का प्रस्ताव बना के लोक निर्माण विभाग लखनऊ भेज दीन गा है। प्रस्ताव पास न होय के कारन सड़क नहीं बनत आय।
ब्लाक जसपुरा का गांव भाथा। भाथा गांव से पड़ोहरा गांव तक लगभग छह किलोमीटर सड़क उखड़ी है अउर पुलिया टूट है।
या सड़क के बीच पड़ै वाला नांदा देव गांव के रामदेवी बतावत है कि जब से सड़क अउर पुलिया टूट हैं आटो चलब बंद है। मड़इन का भाथा उतर के पडोहरा गांव तक पैदल जाय का परत हैं। पी.डब्लू.डी खण्ड दुई के सहायक अभियंता शशि भूषण सिंह कहिन कि या सड़क का प्रस्ताव बना के 2012 मा भेजा गा रहै।
नरैनी ब्लाक का गांव आऊ। हेंया के रमेश अउर दुजिया बताइन कि या सड़क छह किलोमीटर पांच साल से खराब परी है। कइयौ दरकी पी.डब्लू.डी. से सड़क बनवावैं के मांग कीन गे है।
पी.डब्लू.डी. खण्ड एक के अधिषाशी अभियंता राजीव कुमार श्रीवास्तव कहिन कि या सड़क का प्रस्ताव बना के 2012 मा भेजा गा रहै। वित्तीय वर्ष 2012-13 से अबै तक सड़क मरम्मती करण का बजट नहीं आवा आय।

जिला बांदा, ब्लाक नरैनी, गांव पथरा। हेंया के जागेश्वर अउर राजेन्द्र बतावत है कि पथरा पुल से लुधौरा गांव जाय वाली सड़क मा नहर के पास दुई पुलिया लगभग छह महीना से टूट हैं। 17 दिसंबर का दिवली गांव के जांच करैं नरैनी एस.डी.एम. आये रहैं तौ दरखास दीने रहन। पी.डब्लू.डी. खण्ड एक के सहायक अभियन्ता सत्यपाल सिंह कहिन पुलिया अउर सड़क का प्रस्ताव बना के लोक निर्माण विभाग लखनऊ का भेजा गा है। बजट पास होय के बाद सड़क अउर पुलिया बनवाई जइहैं।