कोटा हटवायें की मांग

जिला महोबा, ब्लाक जैतपुर, गांव अजनर। ई गांव को कोटा अंगूरी देवी के नाम हे। पे कोटा बांटे में अंगूरी देवी को आदमी देवकी नन्दन राजपूत आपन मनमानी करत हे। एक दिन से दूसरे दिन कोटा नईं खोलत हे। जीसे गरीबन खा योजना को लाभ नईं मिल पाउत हे। आदमी कोटा हटवा के दूसर कोटेदार वनायें की मांग करत हे।
गांव के श्यामसिंह राजपूत, हमीद खां, टीकाराम अहिरवार ओर सुरेश कुमार कहत हें की हमायें गांव को कोटा पांच-छह साल से अंगूरी देवी के नाम हे। अंगूरी देवी को आदमी रोज कोटा नईं खोलत हे, पेहले पीले रासन कार्ड में पांच किलो गल्ला आउत हतो। कोटेदार के आदमी ने कभऊं नईं दओ हे। दिसम्बर के महिना में पन्द्रह किलो के हिसाब से आओ हतो, जोन कोटेदार ने आधे आदमियन खा गल्ला देके खाना पूर्ति कर लई हती। ईखी दरखास हमने 11 जनवरी खा कुलपहाड़ तहसील दिवस में दरखास दई हती। 12 जनवरी खा कोटा की जांच कर निलम्बत कर दओ हतो। अभे कोटा को चार्ज देवकी नन्दन के पास हे। जीसे अभे भी हमें लाभ नईं मिलत हे। एई से 27 जनवरी खा डी.एम. वीरेश्वर सिंह खा दई हे।
कोटेदार अंगूरी देवी को आदमी देवकी नन्दन राजपूत कहत हे की में सबखा गल्ला देत हतो, ओर रोज कोटा भी खुलत हे। आदमियन से देखो नई गओ जीसे झूठी दरखास दई हे।
डी.एम. वीरेश्वर सिंह ने गम्भीरता से दरखास लेके कुलपहाड़ अपूर्ति विभाग खा जांच करें को आदेश दओ। कुलपहाड़ अपूर्ति विभाग के अधिकारी वी.के. महान ने कहो की जांच चलत हे। कोटा भी निलंम्बत हे। एक दइयां में कछू नईं हो सकत हे।