खबर लहरिया औरतें काम पर कुल्हाड़ी मार खे कर दई हत्या

कुल्हाड़ी मार खे कर दई हत्या

छत में परी शोभा

जिला महोबा, ब्लाक कबरई, कस्बा कबरई, किदवई नगर। एते 9 जून 2014 की रात में शोभा के आदमी पप्पू ने शोभा की कुल्हाड़ी से मार के हत्या कर दई हे। ईखी सूचना कबरई थाने में दई हे। पुलिस मोके में पोंहच के मुआयना करके लाश को पंचनामा भर पोस्टमार्टम खा भेजो हे।
शोभा की बहन आरती ने बताओ कि जीजी ओर जीजा एतई किराया से कमरा लेके रहत हते। अभे आठ दिन पेेहले हमाये घर में शादी हती तो जीजा जीजी खा जायें खा मना करत हते। ऊ नई मानी। दो-तीन दिन बाद कमरा नई गई तो जीजा फोन करके कहत हतो कि कमरा आजा नई तो तोय जान से मार डारहों। एई से में जीजी के साथे आ गई हती। रोज के जेसे हम दोनऊ जने छत में सोउत हते। तभई पप्पू पछाऊं से छत में चढ़ आओ ओर शोभा के गले में कुल्हाड़ी मार दई मोई आंख खुल गई तो जीजा पछाऊं से कूद के भाग गओ। ईखी सूचना हमने कबरई थाने में दई हे। पुलिस ने मोके में आके मुआयना करके लाश को पंचनामा भर पोस्टमार्टम खा भेज दओ हे।
कबरई थाने के एस.ओ. रामकेवल ने बताओ कि धारा 302 (हत्या) के तहत मुकदमा लिख गओ हे। अपराधी अभे फरार हे। ऊखे ढूढे़ की पूरी कोशिश करी जात हे।