करत जागरूक
जिला चित्रकूट, ब्लाक मऊ, गांव हटवा बजरंगी स्कूल। हिंया 21 जनवरी 2014 का राष्ट्रीय मतदाता जागरूकता अभियान मनावा गा। अभियान मा महामति प्राणनाथ डिग्री कालेज अउर शंकर भगवान बी.एड. कालेज के लड़का बिटिया समेत मास्टर अउर अधिकारी शामिल रहैं। अभियान के तहत नाटक भी देखावा गा।
मऊ एस.डी.एम अवधेश श्रीवास्तव कहिन कि हर मड़ई का मतदाता का अधिकार हवै। मतदाता दिवस 25 जनवरी का हवै। या से जघा-जघा रैली निकाल के मड़इन का जागरूक कीन जात हवै।
हटवा गांव के रघू, मोहन अउर पतेलिया का कहब हवै कि हमरे जागरूक होय कुछ न होइ। पहिले अधिकारी खुद जागरूक होय। हम गरीबन का तौ हर जघा इस्तेमाल कीन जात हवै। जबै चुनाव का समय आवत हवै तौ हमका जागरूक करत हवैं
जिला चित्रकूट, ब्लाक मऊ, मुहल्ला टाकीज रोड अनुज गेस्ट हाउस। हिंया 20 जनवरी 2014 का कांग्रेस पार्टी बइठक करिस। या बइठक का कारन रहै कि 2014 मा होय वाले लोक सभा चुनाव का मजबूत करै का हवै। कांग्रेस पार्टी के जिला अध्यक्ष माताबदल भारतीय कहिस कि 2014 के लोक सभा चुनाव का जरूर से जरूर सफल बनावैं का हवै। रणजीत सिंह पटेल कहिन हमका आगे बढ़ै का हवै।
बइठक मा आय कुछ गांव के मड़ई कहिन कि हम तौ कांग्रेस के साथी हन अउर आगे भी रहिबै। हर पार्टी तौ आपन आपन जोर देखावै मा लाग हवै।
या बइठक मा कार्यक्रम अउर ब्लाक अध्यक्ष राकेश पाण्डेय, माताबदल जायसवाल, सुनीता पाण्डेय, जुगुल किशोर, राजू, महेन्द्र पाण्डेय, सुकुरू अउर चन्दमोहन शामिल रहंै।