जिला अम्बेडकर नगर, ब्लाक भीटी गांव मदारभारी। हिंआ 20 मई का ट्यूबवेल कै लाइन ठीक करत रहिन तीन लाइनमैन हाईटेंशन तार मा करंट उतरै से गम्भीर रुप से घायल होय गइन। जल्दीबाजी मा सामुदायिक स्वास्थ्य केन्द्र भीटी पहुंचाइन। वहिंसे जिला अस्पताल रिफर कै दियागै।
गांव के मनइन कै कहब बाय कि राजकीय नलकूप के बिजली सप्लाई मा कुछ कमी आइगै रही। भीटी उपकेन्द्र मा तैनात लाइनमैन बेलवरा गांव कै पचास साल कै जयप्रकाश दूबे भीटी कै रहै वाले छब्बीस साल कै आशुतोष ओझा खरसा गांव कै अनिल दूबे बारह बजे के करीब मा लाइट ठीक करत रहिन। अचानक एचटी तार मा विजली कै करंट आय जाए से तीनौ लाइनमैन करंट से जरि गइन। करंट लागै से तीनौ लाइनमैन तार मा चिपक गइन। गोहार लाग गांव कै मनई पावर कार्पोरेशन का सूचना दिहिन। तुरंत सामुदायिक स्वास्थ्य केन्द्र भीटी पहुंचाइन। वहिंसे डाक्टर जिला अस्पताल रिफर कै दिहिन। आशुतोष कै हालत ज्यादा गम्भीर हुवय से लखनऊ ट्रामासेंटर रिफर कै दिहिन। अनिल दूबे अउर जयप्रकाश दूबे कै कहब बाय कि बिजली कै सप्लाई बन्द कियागै रहा तबौ करंट उतर आय। पावर कार्पोरेशन के लापरवाही के कारन ई घटना भै बाय। यकै जांच करावै कै मांग कीन गै बाय।
विद्युत वितरण पावर कार्पोरेषन अधिशाषी अभियंता मुकेश बाबू कै कहब बाय कि मामला कै जांच कराय जात बाय। कउनौ तरह के लापरवाही मिले तौ कार्यवाही कीन जाये।