तहसील में करत हंगामा
जिला महोबा, ब्लाक कबरई, गांव मकरबई। एते एक महीना पेहले सोना गे्रनाइट के मालिक ओर गांव के आदमियन के बीच भई फायरिंग थमें को नाम नई लेत आय। जीसे गांव के आदमी रात में ब्लास्टिंग ओर ओवर लोडिंग खा लेके बोहतई परेशान हें। गांव के आदमियन ने 6 जनवरी 2015 खा दुबारा से डी.एम. वीरेश्वर सिंह खा दरखास दई हे।
बलराम, चेतराम, मंगल प्रसाद ओर सुनील ने बताओ कि हमाओ समझौता 12 नवम्बर 2014 खा डी.एम. ने कराओ हतो। जीमे सोना ग्रेनाइट के मालिक ने दिन में एक दइयां ब्लास्टिंग करवाये खा करो हतो। साथे जोन हमाओ नुकसान भओ हे ऊखो मुआवजा देय खा कहो हतो। पे ई समझौता के हिसाब से कोनऊ काम नई होत आय। काय से अभे भी रात तें ब्लास्टिंग कराई जात हे। जोन किसान रात के आपन खेत रखाउन जात हें तो के्रशर वाले बन्दूक लेके पोहोंच जात हें। लल्लू, रज्जूपाल ओर राममिलन ने बताओ कि सेक्टर नम्बर 79, 7403, 789 ओर 1026 हमाई जमीन हे। जीमे क्रेशर मालिक ने कचरा डलवा के 20 से 60 कड़ी की रास्ता बना लई हे। दरखास देय पे राजस्व विभाग के अधिकारी एक महीना के भीतर कब्जा हटवाये आस्वासान दओ हतो, पे अभे तक कोनऊ कारवाही नई होत आय।
एस.डी.एम.राकेश कुमार ने बताओ कि ओते की हमने पैमाइस करा दई हे। अगर ऊखो मामला अभे शान्त नई होत हे तो एक हफता के भीतर खनन विभाग, डी.एम. ओर गांव वालेन के बीच बेठ के समझौता कराओ जेहे