खबर लहरिया चित्रकूट कबै खतम होइ आगनबाड़ी कार्यकर्तन के समस्या

कबै खतम होइ आगनबाड़ी कार्यकर्तन के समस्या

पिछले एक महीना से आगनबाड़ी का धरना प्रदर्शन उत्तर प्रदेश के ज्यादातर जिलन मा चलत हवैं।आगनबाड़ी आपन मानदेय अउर स्वास्थ्य सुविधा का लइके सरकार के लगें तक जा चुकी हवैं।पै सरकार तक पहुंचै मा उनका लाठी डंडा के मार तक सहै का पड़ी हवै।पै सरकार आजौ उनकर समस्या नहीं ख़तम करत आय। आखिर सरकार काहें नहीं आगनबाड़ी कार्यकर्तन के सुनवाई करत हवै?
कबै तक उई आपन घर दुवार लड़का बच्चा अउर केंद्र छोड़ के धरना प्रदर्शन करत रहिहैं?सरकार काहे नहीं आपन फैसला सुनावत हवै?कबै तक आगनबाड़ी आपन मांग खातिर दर-दर भटकत रहिहैं?एक कइती तौ सरकार कहत हवै की मिनी आगनबाड़ी केंद्र खोले जइहैं?का  मिनी आगनबाड़ी खातिर सरकार के लगें रूपिया हवैं?सरकार का चाही की पहिले आगनबाड़ी कार्यकर्तन के मांग का देख कै निपटावै जेहिसे उंई कम से कम आपन काम निकतान से कइ सकै?नहीं तौ छोट छोट बच्चन के मिलै वाला पोषाहार अउर उनकर पढ़ाई तौ बेकार होइ जई?