खबर लहरिया बुंदेलखंड कंहू घर तो कंहू खेत में लाग आगी

कंहू घर तो कंहू खेत में लाग आगी

लाड़कुवार ओर लखन

लाड़कुवार ओर लखन

जिला महोबा, कबरई ब्लाक, गांव सलारपुर। एतें लाड़कुवंर के घर में 27 अक्टूबर 2013 खा दिन में दो दइयां आगी लागी हे। ईखी सूचना लेखपाल खा दई हे।
लाड़कुंवर ने बताओ कि में 27 अक्टूबर 2013 खा सुबेरे खेत चली गई। तभई 9 बजे घर में आगी लागे की खबर मिली। जभे तक में आई मोय घर में धरो आनाज ओर कपड़न के साथे लगभग एक लाख को नुकसान भओ हे। आदमियन ने कुंआ में इंजन धर के आगी बुझाई हे। ईखी सूचना लेखपाल खा दई ।
लेखपाल सीताराम ने बताओ कि में 28 अक्टूबर 2013 खा मुआयना करन गओ हों। जीखी रिपोर्ट मेंने तहसील में भेज दई हती, पे ऊने थाना में रिपोर्ट कर दई हे, एई से ऊखे मुआवजा न मिलहे।
एसई जैतपुर ब्लाक, गांव खैरारी में 24 अक्टूबर 2013 खा खेमचन्द्र के खलिहान में गांव के हरिसिंह ने आगी लगा दई हे। जीसें चार बीघा मूंगफली की फसल जर के राख हो गई हे। खेमचन्द्र की ओरत राजकुमारी ने बताओ कि हमने 24 अक्टूबर 2013 खा मूंगफली की फसल इकट्ठा कराई हती। तभई गांव को हरिसिंह ने खेत में बीड़ी जलाई ओर फसल में आगी लगा दई। जभे घरे पोंहची तो तुरतई आदमियन ने फोन करो कि फसल में आगी लगी हे। जभे पोंहचे तो फसल जर के राख हो गई हती। कुुलपहाड़ कोतवाली ओर लेखपाल खा सूंचना दई हती। लेखपाल इन्द्रपाल ने बताओ कि में मुआयना करो हे तो ऊखो लगभग पचास हजार रूपइया को नुक्सान भओ हे। ईखी रिर्पोट मेने कनूनगो खा भेज दई हे।