खबर लहरिया बुंदेलखंड एक रात मे तीन घरन मे चोरी

एक रात मे तीन घरन मे चोरी

जिला महोबा, ब्लाॅक जैतपुर, कस्बा कुलपहाड़ मोहल्ला टोरियापुरा। एते 13 जून की रात मे तीन घरन मे इक्टट्ठा चोरी हो गई हे। जीमें हजारो रूपइया नगद के साथे लाखन को सामान चोरी मे गओ हे। आदमियन ने कुलपहाड़ कोतवाली मे दरखास दई हे।
जयसिंह कहत हे की मे अपने परिवार के साथे आंगन मे सोउत हतो। तभई रात मे चोरी हो गई हती। जभे हम सुबेरे जागे तो कमरा के ताला टूटे परे हते। आंगन मे सब सामान फेलो हतो। चोरी को नाजारा देख के हमाये होश उड़ गये, हते, चोरी मे मोओ सोने चांदी के जेवर ओर लाख रूपइया नगद चलो गओ हे।
रतीराम रैकवार कहत हे की 13 जून की रात में चोर हमाये घर के पछाऊं की दीवार फंद के आयें हे। में रेलवे विभाग मे नौकरी करत हतो। रिटायरमेट को दस लाख रूपइया मिलो हतो। दो बिटियन की सात जोड़ी पायल, चूड़ी, झुमकी, मंगल सूत्र ओर चार बिछुआ घर मे धरो हतो। जोन चोर ले गये हे। मोई पूरी जिन्दगी की मेहनत एक रात की चोरी मे चली गई। ईखी दरखास हमने अज्ञात मे कुलपहाड़ कोतवाली मे दई हे। पुलिस ने हमाई रिपोर्ट नई लिखत हे। जीसे हम लोग मुकदमा लिखायें के लाने पुलिस कोतवाली के चक्कर लगाउत हे। पे पुलिस हमाई सुनवाई नई करत हे।
कुलपहाड़ कोतवाली को कोतवाल सतीश चन्द्र शुक्ला कहत हे की अज्ञात मे दरखास मिली हे। मुकदमा नई लिखो हे। जांच चलत हे। जांच के बादई मुकदमा लिखो जेहे।

रिपोर्टर – श्यामकली