जिला चित्रकूट, ब्लाक मऊ, गांव करही, पुरवा जोरवारा। हिंया रोड वेज बस नम्बर यू.पी. 90 टी. 2492 से जोरवारा पुरवा मा एक्सीडेंट होइगा। यहै से तेरह साल के गेंदालाल अउर तेरह साल के हुलूवा के मौत होइगे।
जोरवारा पुरवा के घनश्याम का कहब हवै कि मोर लड़का गेंदालाल अउर रमरतिया का लड़का हुलूवा साइकिल मा स्कूल से आवत रहैं। कर्वी से रोडवेज बस आई अउर दूनौं लड़कन का टक्कर मार दिहिस। गेंदालाल दरे मा मर गा अउर हुलूवा घायल होइगा। वहिका इलाहाबाद स्वरूपरानी अस्पताल मा भर्ती कीन गा। वा भी 31 दिसंबर का इलाज के दौरान दम तोड़ दिहिस।
मऊ थाना के छोट दरोगा राम आसरे त्रिपाठी का कहब हवै कि रपट लिखगे हवै। अपराध संख्या 402/2014 धारा 279 (तेज रफ्तार से वाहन चलाउब) 337 (एक्सीडेंट) 304ए (मौत) के धारा लाग हवैं। बस का पकड़ के थाना मा ठाड कइ लीन गा हवै। ड्राइवर अबै फरार हवै। कारवाही जरूर होइ।
ब्लाक कर्वी, मंदाकिनी नदी पुल के लगे। हिंया 29 दिसंबर 2014 का ठेला, टैम्पो अउर डम्पर से भयंकर एक्सीडेन्ट होइगा। जेहिमा सात जने घायल हवैं। देवी दीन का कहब हवै कि ठेला यू.पी. 70ए 1612 मुर्का कस्बा जात रहै। मुर्का का सहाबुद्दीन ठेला चलावत रहै। कौशाम्बी जिला का डम्पर नम्बर यू.पी.73ए4840 कर्वी से अउर टैम्पो नम्बर यू.पी.96 सी. 9426 जात रहै। इं दूनौ आपस मा भिड़ गे अउर तीनौ नदी के किनारे कूद गंे। टैम्पो मा बइठ चार मड़ई टैम्पो का ड्राइवर समेत सात लोगन का कर्वी सोनेपुर अस्पताल भेजा गा। कर्वी कोतवाली के मुंशी उग्रेश त्रिपाठी का कहब हवै कि मुकदमा संख्या 116/2014 279( तेज गति से वाहन चलाउब) 337 (एक्सीडेंट) 427(पचास रुपिया तक से ज्यादा का नुकसान) के धारा लाग हवंै।