उजार दिहिन बगिया

जिला फैजाबाद, ब्लाक मया, ग्रामसभा रजपलिया, गांव बलरामपुर। हिंआ ग्राम समाज के जमीन पै गांव कै मनई कै कब्जा सन् 1955 से बाय। वह जमीन मा आम, नीम, महुआ, कोठ, गुलर जइसन कउयौ तरह कै पेड़ लगाई गै बाय। 5 मार्च 2016 कै ग्राम प्रधान सिकरेट्री बिना बताये सारा पेड़ गिरवाए दिहिन।
बलरामपुर कै शंकर यादव कै कहब बाय कि गांव मा लगभग बीसौ मनईन कै पेड़ रहा। हमरे सब का प्रधान राम अछैबर मेट जुगल किशोर यादव, जानकारी नाय दिहे रहिन। न तौ गांव मा मीटिंग करवाईन। बिना बताए जे.सी.बी. से पूरा बगिया कै पेड़ उखड़वावै लागिन। कहां सरकार पर्यावरण सही रहै खातिर जगह-जगह वृक्षारोपण करावत बाय। तौ इनके सब जड़ उखड़वाए देत हईन। जब हमरे सब रोकै गयेन जे.सी.बी. चालक आजाद कहिन हटि जा नाहीं तौ तोहरे सब के ऊपर चढ़ाय देब। हमरे सब कै पुश्तैनी कब्जा बाय। लकिन दबंगई कई कै पूरा बगिया उजार दिहिन। सुनै मा आवत बाय कि बनराजा कै कालोनी बने लकिन उनके सबका पहिले पट्टा मिल चुका बाय। 7 मार्च कै नायब तहसीलदार अउर डी.एम. आइके रूकवाये हईन।
ग्रामसभा प्रधान राम अछैबर बताइन कि हम एक हफ्ता पहिले बताय देहे रहेन तबौ अबहीं तक केहू का जानकारी नाय बाय।