आगी लगायें को आरोप, पुलिस नईं करत कारवाही

जिला महोबा, ब्लाक जैतपुर, कस्बा कुलपहाड़, सत्तियन पुरा मोहल्ला। मंगल सिंह को आरोप हे की 31 जनवरी खा राहुल यादव ने दुकान में आगी लगा दई हती। जीसे लगभग तीस हजार को नुक्सान भओ हे। ईखी दरखास कुलपहाड़ कोतवाली में दई हे।
मंगलसिंह कहत हे की 31 जनवरी खा रात 8 बजे दुकान में आओ ओर गुटका मांगन लगो। मेने रुपइया मांगो तो कहतहतो की रुपइया देने हे तो तोई दुकान हे का, मेनें गुटका देय से मना करो तो मारपीट करन लगो। कहत हतो की तोई दुकान में आगी लगा देहों। आई रात में दुकान मे आगी लग गई। जीसे पूरी परचून को सामान जल के राख हो गओ। में एई दुकान से परिवार चलाउत हतो। में कैंसर को मारीज भी हों। पुलिस ने एक दिन राहुल खा एक दिन के बाद छोड़ दओ हतो। एई से 4 फरवरी खा एस.पी. खा दरखास दई हे ओर न्याय की मांग करी हे। राहुल कहत हे की मेनें आगी नई लगाई हे, मोये ऊपर झूठो आरोप लगाउत हे। में कसम करें खा कहत हों तो ऊ नई करत नई में पूरो नुक्सान भरें खा तैयार हो।
कुलपहाड़ कोतवाली के कोतवाल सतीश चन्द्र शुक्ला कहत हे की हमने पूछंताछ करी हती। ऊने आगी नईं लगाई हे एई से ऊखे छोड़ दओ हे। जांच चलत हे।