जिला बांदा, ब्लाक नरैनी, गांव जमवारा, मजरा केवटन पुरवा। कूड़ा के ढेर मा सुलगत आगी इनतान फइल गे कि घर गृहस्थी का सामान जल के राख होइगा। गांव के मड़ई अउर देर से पहुची फायर बिग्रेड के गाड़ी एक घण्टा कड़ी मसक्कत के बाद आगी मा काबू पाइन। साथै सूचना पा के मौके मा पहूंचे लेखपाल भी मौका मुआयना करिन।
नरैनी तहसील के जमवारा गांव मा कूड़ा के ढेर मा सुलगत आगी 1 मई का सुबेरे लगभग 9 बजे यतना भयानक रूप लई लिहिस। जेहिसे बगल मा बने गोरेलाल के घर मा आगी पहूंच गे। आगी के लपेट देख गांव वाले दउरे अउर पुलिस का सूचना दिहिन। तबै फायर बिग्रेड के गाड़ी आई अउर आगी मा काबू मिली।
गोरे लाल बताइस कि आगी लागै से घर अउर गृहस्थी का पूरा सामान जल के राख होई गा है। यहिसे अब खुले आसमान के नीचे परिवार सहित रहैं का मजबूर हौं।
हल्का लेखपाल आनन्द स्वरूप श्रीवास्तव का कहब है कि घटना का मुआयना कइके रिपोर्ट तहसील मा जमा कइ दीन गे है। जल्दी मुआवजा मिली।
यहिनतान तिन्दवारी ब्लाक, गांव चकला के सेमिया कहत है कि मै रिशतेदारी मा चली गे रहौं। तबै 30 अप्रैल का मोरे घर मा आगी लाग गे रहै। जेहिसे गृहस्थी का पूरा सामान जल के राख होइगा है। 7 जुलाई का मोरे लड़का के शादी भी है। यहिसे सोच सोच के परेशान हौं।
लेखपाल लखन अउर कानून गो कल्लू का कहब है कि वहिका लगभग एक लाख रुपिया का नुकसान भा है, तौ रिपोर्ट बना के तहसील मा जमा कइ दीन गे है।
रिपोर्टर – गीता और शिवदेवी