जिला महोबा, ब्लाक कबरई कस्बा कबरई। पानी न बरसे के कारन आदमी एसी ठण्डी में बूंद-बूंद पानी खा तरसत हे। घनश्याम त्रिपाठी की अध्यक्षता मे कस्का के आदमियन ने 26 दिसम्बर खा धरना धरो हतो। एस.डी.एम. ने सवा महीना के भीतर समस्या दूर करें को अस्वासन दओ हे।
कालूराम विश्वकर्मा, साहिब सिंह ओर महेश चन्द्र कहत हे की एक साल से पानी खे लाने बोहतई भटकत हे।पाइप लाइन से पानी नई आउत हे। हैण्डपम्प ने पानी छोड़ दओ हे। हम बूंद-बूंद पानी खा तरसत हे। घनश्याम त्रिपाठी कहत हे की 18 जून खा में टंकी में चढ़के जान देत हतो। तभई जल संस्थान के जे.ई. एस.के. वर्मा ने लिखित दओ हतो। कहत हतो की जल्दी दूर करी जेहे। छह महिना के बाद भी कोई सुनवाई नईं भई हती। रामकरन नामदेव, कैलाश गुप्ता ओर हर्षवर्धन त्रिपाठी कहत हे जभे एसी सर्दी में पानी को जा हाल हे तो गर्मी में का हो हे। पानी बिना जानवर तो मरत हे, आदमी भी परेशान हे। अगर हमाई मांगे सवा महीना में पूरी न हों हे तो आमरण अनशन करहें।
महोबा एस.डी.एम. सुनील प्रताप सिंह कहत हे की मेने कबरई जाके निरिक्षण करो हे। पानी के पूर्ति के लाने टैंकर भेजे जात हे। जलसंस्थान विभाग में जल्दी से पाइप लाइन बनवायें खा कहो हे।