बुन्देलखण्ड मा किसान कत्तौ बाढ़ तौ कतौ सूखा के कारन परेशान रहत हवै। किसान के एक अउर बड़ी समस्या अन्ना जानवर के हवै, यहै कारन किसान रातभर जाग के आपन खेत के रखवाली करत हवै। यहिनतान 17 मार्च का रखवाली करत दरकी चित्रकूट जिला के गाहुर गांव के किसान राममिलन के हत्या होइगें हवै।
भाई संतराम शुक्ला का कहब हवै कि मोर भाई शाम के खेत चला गा रहै, पता नहीं वहिका को मार के पानी मा डाल दिहिन हवै। हम सगले सुबेरे से ढूढ़ब शुरू कइ दीने हन, बाद मा वहिके लाश मिली हवै। खेत जबै से बोय गें रहै तबै से रोज खेत ताके जात रहै। हमार कउनौ से कुछौ दुश्मनी नहीं रहि आय, अगल-बगल कोल बसे हवै। महतारी देवलाल का कहब हवै कि मोर लड़का कुछ आपन खेत अउर कुछ बटाई का खेत लिए रहा हवै। बहु निशा शुक्ला बताइस कि मोर ससुर के मुड़े मा चोट लाग रहि हवै। मऊ सीओ अउर एसपी आये रहै अउर कहिन हवै कि अपराधी का जल्द से जल्द पकड़ के कड़ी कारवाही कीन जई।
बरगढ़ थाना के दीवान का कहब हवै कि अज्ञात के नाम रपट लिख गे हवै अउर जांच चलत हवै, जल्दी खुलासा कीन जई। लाश पोस्टमार्टम खातिर भेज दीन गे हवै।
रिपोर्टर- सुनीता देवी
