हर जघा पानी के समस्या

Picture paaniजिला चित्रकूट, ब्लाक मानिकपुर, कस्बा मारकुण्डी, मड़इयन अउर कैलहा गांव। इं गांव मा पानी के समस्या लगभग तीन पीढ़ी से हवै। पानी खातिर दस हजार मड़ई परेशान हवैं। पानी के समस्या का खतम करैं खातिर विधायक चन्द्रभान सिंह पटेल का 23 मार्च 2013 का लिखित भी दीन गे, पै कउनौ सुनवाई नहीं भे आय। मानिकपुर विधायक चन्द्रभान सिंह पटेल का कहब हवै कि पन्द्रह दिन के भीतर पानी के समस्या खतम कीन जई। नये हैण्डपम्प लगवाये जइहैं।

मड़इयन गांव के ललिता, मारकुण्डी कस्बा के नथिया अउर मनोरमा का कहब हवै कि पियै खातिर पानी के बहुतै समस्या हवै। अबै तक तौ जाड़ा का समय रहै, पै अब गर्मी आ गे हवै। यहै से पानी के समस्या अउर ज्यादा सतावत हवै। बिन पानी कउनौ काम नहीं होत हवै। पानी खातिर कउनौ दूसर व्यवस्था नहीं होत हवै। मड़ई तौ कउनौतान पानी लइ आवत हवैं, पै जानवर तौ पियासे हिंया-हुंवा भटकत फिरत हवैं।
यहिनतान पानी के दूसर खबर रामनगर ब्लाक, गांव भंभेट के कालोनी पुरवा मा हवै। हिंया के सियारानी, नीलम अउर सविता का कहब हवै कि आबादी डेढ़ सौ हवै। एक हैण्डपम्प लाग हवै। वहौ पानी नहीं देत हवै। आधा किलो मीटर दूर पानी लें जाये का परत हवै। प्रधान शेषनारायण का कहब हवै कि छह महीना पहिले ब्लाक मा हैण्डपम्प लगावै खातिर लिखित दीने हौं पास होइ तौ लाग जइहैं।”