सपा के कर्वी प्रत्याशी वीर सिंह से हमने किये कड़क सवाल. #KaamBoltaHai

जिला चित्रकूट, कस्बा कर्वी चुनाव के समय सपा पार्टी का गाना जंहा उठती है नजर इंतजाम बोलता है काम बोलता है, काम बोलता है। लहलहाते खेत, स्कूल जात बिटिया, तेजी से ट्यूवबेल से गिरत पानी या नये जमाना के प्रदेश का प्रचार का देखावत है सपा पार्टी।
आओं जानी चित्रकूट जिला मा सपा पार्टी के विधायक वीर सिंह पटेल से कि हिंया काम कहां बोलत हवैं।वीर सिंह मशहूर डकैत ददुवा का लड़का आय। 2006 से वीर सिंह राजनीति मा आये हवैं।
चित्रकूट के काम के बारे मा सपा विधायक वीर सिंह का कहब हवैं कि ओवरब्रिज बनवावा गा हवै। शहर का 22 घंटा बिजली दीन गे हवै,राजापुर का पुल, भदेहदूं का पुल, साईपुर का पुल बनवावा गा हवै। 15 घंटा बिजली दीन गे हवैं। जबै गांवन मा सूखा पड़ा रहै 1100 हैण्डपम्प लगवाये गे रहै। रामघाट मा सुन्दरीकरण करावा गा हवै।
बेड़ीपुलिया से चित्रकूट तक के सड़क का चौड़ी कीन गा हवै।चुनावी महौल मा डकैतन के बारे मा वीर सिंह कहत हवै कि अब हियां डकैत नहीं आय। मड़ई बिना डेर के वोट डाल सकत हवै।विकास के मुददा का लइके मतदान होइहैं।घर अउर बाहर मेहरिया कत्तौ सुरक्षित नहीं आय अउर घोषणापत्र मा मेहरिया मुददा मा का खास कीन गा हवै यहिके बारे मा वीर सिंह कहत हवै कि मेहरियन खातिर 1090 चलाई गे हवै। डायल 100 के शुरुआत कीन गे हवै जेहिमा फोन करै के बाद पुलिस 15 से 20 मिनट के भीतर पहुंच जई।
विधायक निधि से गरीबन के इलाज खातिर रुपिया दीन गा है। सड़क बनवाई गई गें हवैं। सोलर लाइट के व्यवस्था भी कीन गे हवै। कर्वी से तीन किलोमीटर दूरी छिपनी गांव मा कालेश्वर नाथ का पुरवा हवैं। हिंया के मड़ई बतावत हवै कि सपा पार्टी के राज मा हमार गांव मा काम नहीं बहुत कुछ बोलत है। हमार गांव सड़क, पानी, बिजली के समस्या से अबै भी जूझत हवैं। नाली बनी आय, न शौचालय बने आहीं।
हमार गांव मा आज तक सड़क नहीं बनवाई गें आय।गांव जाये मा 10 मिनट के जघा 2 घंटा लागत हवैं। तौ या गांव मा पुलिस के गाड़ी कसत 20 मिनट मा आ सकत हवै। या गांव मा कुछौ विकास नहीं देखात आय। अब हियां के मड़इन के लगे दुइ रास्ता हवै चुनाव बहिष्कार करै या तौ दूसर विधायक का चुनाव करै जेहिसे या गाव मा भी काम बोलत देखाई पड़ै।

रिपोर्टर- मीरा जाटव और मीरा देवी

17/02/2017 को प्रकाशित