सड़क नाली में या नाली में सड़क, चित्रकूट जिले के कुंजन पुरवा का हाल

कउन नाली कउन सड़क आय या समझ मा नहीं आवत काहे से हिंया के सड़क के हालत बहुतै ख़राब हवै। काहें से घरन से निकलें वाला गंदा पानी सड़क मा भरा रहत हवै।जेहिसे आय दिन मड़ई के चोट लाग जात हवै अउर गंदे पानी के कारन बीमारी होइ जात हवै या कहब आय जिला चित्रकूट,ब्लाक कर्वी,गांव कसहाई, मजरा कुंजनपुरवा के मड़इन का।
रामकरन मिश्रा का कहब हवै की या दसन साल से सड़क ख़राब हवै।पहिले खेतन मा पानी जात रहै पै अब मड़ई आपन खेत मा बांध बना लिहिन हवैं तौ सड़क मा पानी भरत हवै काहे से हिंया नाली नहीं बनी आय।कइयौ पंचवर्षीय योजना बीत गई हवैं पै अबै तक कउनौ प्रधान नहीं सुनिन आय।प्रधान कहत हवैं कि बजट नहीं आय।
प्राची केशरवानी बताइस की  पानी के बीच से निकले के कारन  गिर गई रहिंव जेहिसे कमर के हड्डी टूट गे रहै।तबै दस पन्द्रह हजार रूपिया इलाज करें मा लाग रहै।आदर्श पब्लिक स्कूल के हेडमास्टर राजेन्द्र सिंह का कहब हवै की साल भर यहिनतान सड़क मा पानी भरा रहत हवै बरसात मा तौ गांठी तक पानी से बच्चन का निकलें का पड़त हवैं।
विनोद कुमार केशरवानी बताइस की ठेलिया निकाले मा बहुतै परेशानी होत हवै।  कउनौतान ठेल के ठेलिया निकालत हौं।प्रधान राम सजीवन वर्मा बताइस की एक दरकी नाली बनवा दीने हन काहे से खेत वाले आपन खेत मा पानी नहीं जायें देत रहै।
वीडीओ कुलदीप कुमार का कहब हवै कि कसहाई के सबै पुरवा मा आर.सी.सी सड़क बनाई जइहैं।एक साल के भीतर सब बन जइहैं अउर प्रधान से कहि के दुइ चार दिन मा पानी निकालवावें के व्यवस्था करवा दीन जई।

बाईलाइन-नाजनी रिजवी और मीरा जाटव