सुविधा बिना चार चांद लगाउत उपकेन्द्र

taza upkendra luhariजिला महोबा, ब्लाक चरखारी, गांव लुहारी। एते बनो 2008 को उपकेन्द्र अभे भी खुले के हालत में नइयां। जीखे कारन गांव के ओरतें टीका लगवाये खा परेशान रहत हें।
गांव के तारा सिंह ओर श्याम सुन्दर ने बताओ कि जभे से उपकेन्द्र बनो हे। तभे से एते कोनऊ डाक्टर या नर्स नई आई आय। जभे अस्पताल बनो हतो तभे हम खुश भये हते कि अब हम खा दवाई करायें चरखारी कस्बा के अस्पताल न जाने परहे। बाद में पता चलो कि ऊ अस्पताल ओरतन खे लाने बनाओ गओ हे। ई जान के हम ओर खुश भये हते। काय से ज्यादा परेशानी मां बने खे समय ओरतन खा ही होत हे। अब हमाई समस्या को समाधान हो गओ, पे हमें का पता हतो कि हमाई समस्या कभऊं न खतम होहे।
ए.एन.एम. ऊषा सक्सेना ने बताओ कि उपकेन्द्र में रहें खा सुविधा नइयां। एई से महीने के पेहले बुधवार खा उपकेन्द्र में बेठ के टीकाकरन करत हों।
जिला स्वास्थ्य सूचना अधिकारी इन्चार्ज नवीन कुमार ने कहो कि चरखारी अस्पताल के डाक्टर खा नोटिस भेज के रिपोर्ट मांगी जेहे। कोनऊ लापरवाही होय पे कारवाही होहे।

गंदगी देख खे भड़के डी.एम
महोबा जिला अस्पताल में 20 सितम्बर 2014 खा डी.एम. वीरेश्वर सिंह ने जांच करी हे। जीमे समय से न आये के कारण डाॅक्टर के.डी. गुप्ता के साथे सब डॅाक्टरन खा डांट लगाई हे। महिला अस्पताल ओर जच्चा-बच्चा वार्ड में चादर गन्दे मिले के कारन सफाई कर्मी सोमदत्त खा डांट लगाई हे। साथ ही वार्ड ब्वाय अरबिन्द कुमार खा तुरतई हटाये खा कहो हे। अस्पताल की हालत देख के सी.एम.एस. डाॅक्टर दया शंकर खा सफाई पे ज्यादा से ज्यादा ध्यान देय को आदेश देओ हे।