साहब दो महीना से नई मिलों रासन

तहसील में करत हंगामा
तहसील में करत हंगामा

जिला महोबा, ब्लाक कबरई, गांव बिलरही। एते के एक दर्जन आदमियन ने कोटेदार के नाम की दरखास महोबा एस.डी.एम. खा दई हे। कोटा ना बाटें ओर बाजार में बेचे को आरोप लगाओ हे।
राजेन्द्र गौतम, दुर्जन ओर बिन्द्रावन बताउत हे की हमाये गांव को कोटा लगभग पन्द्रह साल से विनोद कुमारी के नाम चलत हे। अभे ओई के घर में प्रधानी हे। दबंगई के कारन जनवरी ओर फरवरी महीना को रासन नई बांटो हे। जीखी लिस्ट 16 मार्च खा एस.डी.एम. खा दई हती। कोटेदार ओर ऊखो लड़का हरजन एक्ट ओर कोटा मे रासन लेय जायें, पे जान से मारे की धमकी देत हे।
शिवचन्द अहिरवार कहत हे की मोई उमर चासिस साल से ज्यादा हो गई हे। आज तक ईने मोओ रासन कार्ड नईं बनाओ हे। मोये चार लड़का ओर तीन बहू हे। कोनऊ को रासन कार्ड नईं बनो हे। हम लोग बाजार से डीजल खरीद के जलाउत हे। हम गरीब आदमी हे एक-एक दाना खा ई साल मोहताज हें। हम लोग दो हजार कुन्तल को गल्ला खरीद के खात हे। अगर सुबह सब्जी बना लेत हे तो शाम खे नमक रोटी खात हे। महोबा एस.डी.एम. सुशील कुमार सिंह ने दरखास खा गम्भीरता से ले न्याय दिबायें को भरोसा दओ हे। कोटेदार कहत हे की हम दलित ओर गरीब हे। ऊ सब दबंग ओर उच्च जाति के आदमी हे। कहत हे की गरीबन के रासन कार्ड काट के हमाये बी.पी.एल. ओर अन्तोदय रासन कार्ड बनाओ। मना करी तो झूठी दरखास दे दई हे।